राज्यातील अनेक भागांत पावसाची कमतरता जाणवत असताना आगामी उन्हाळ्यात उद्भवणाऱ्या पाणीटंचाईवर मात करण्यासाठी गुहागर तालुक्यातील झोंबडी ग्रामपंचायतीने जलसंधारणाचा पुढाकार घेतला आहे. सरपंच अतुल लांजेकर यांच्या पुढाकारातून झोंबडी नदीपात्रात बंधारे उभारण्याच्या कामाला सुरुवात करण्यात आली असून, ग्रामस्थांनी श्रमदानातून या उपक्रमात सहभाग घेतला आहे.
भविष्यातील पाणीटंचाईचा प्रश्न लक्षात घेऊन झोंबडी ग्रामपंचायतीने ६ ऑक्टोबर २०२६ रोजी विशेष ग्रामसभेचे आयोजन केले होते. या ग्रामसभेत सरपंच अतुल लांजेकर, उपसरपंच, ग्रामपंचायत सदस्य आणि ग्रामस्थांच्या उपस्थितीत नदीपात्रातील योग्य ठिकाणी बंधारे उभारण्याबाबत चर्चा करून नियोजन करण्यात आले.
या नियोजनानुसार ८ ऑक्टोबर रोजी झोंबडी नदीपात्रात बंधारे उभारण्याच्या कामाला सुरुवात झाली. ग्रामपंचायतीच्या आवाहनाला प्रतिसाद देत झोंबडी तेलीवाडीतील ग्रामस्थांनी स्वतः पुढाकार घेत श्रमदान केले. ग्रामस्थांच्या एकजुटीतून जलसंधारणाच्या कामाला प्रत्यक्ष सुरुवात झाल्याने गावातील पाणीप्रश्न सोडवण्यासाठी लोकसहभागाचे महत्त्व अधोरेखित झाले आहे.
पाणी अडवून भूजलपातळी वाढवण्याचा प्रयत्न
पावसाचे पाणी वाहून जाण्याऐवजी नदीपात्रात अडवून त्याचा उपयोग व्हावा, भूजलपातळीत वाढ व्हावी आणि आगामी उन्हाळ्यात पाणीटंचाईची तीव्रता कमी व्हावी, हा या उपक्रमामागील प्रमुख उद्देश आहे. ‘पाणी अडवा, पाणी जिरवा’ या संकल्पनेतून हाती घेतलेल्या या कामामुळे परिसरातील जलसाठा वाढण्यास मदत होण्याची अपेक्षा ग्रामस्थांनी व्यक्त केली आहे.
ग्रामस्थांचा उत्स्फूर्त सहभाग
या जलसंधारणाच्या उपक्रमात शंकर लांजेकर, वासुदेव लांजेकर, तुकाराम लांजेकर, प्रभाकर लांजेकर, शशिकांत लांजेकर, विष्णू लांजेकर, विकास पवार, दत्तुराम पवार, महेश लांजेकर, ग्रामसेवक दीपक गायकवाड आणि सरपंच अतुल लांजेकर यांच्यासह अनेक ग्रामस्थांनी सहभाग घेतला.
ग्रामपंचायत आणि ग्रामस्थांनी एकत्र येऊन सुरू केलेल्या या कामामुळे गावाच्या पाणीप्रश्नासाठी केवळ शासकीय मदतीवर अवलंबून न राहता लोकसहभागातूनही ठोस प्रयत्न करता येऊ शकतात, हे अधोरेखित झाले आहे. भविष्यात नदीपात्रातील आवश्यक ठिकाणी आणखी बंधारे उभारून पाणीसाठा वाढवण्याचे नियोजन असल्याचे सांगण्यात आले.
आज अडवलेले पाणी उद्याच्या पाणीटंचाईवर मात करण्यासाठी उपयोगी ठरावे, या उद्देशाने झोंबडी ग्रामस्थांनी सुरू केलेला हा उपक्रम परिसरातील इतर गावांसाठीही जलसंधारणाची प्रेरणा ठरू शकतो.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
