खेड मुंबई-गोवा महामार्गावरील खेड तालुक्यातील बोरघर येथे आज गुरुवारी दुपारी सुमारे दीड वाजण्याच्या सुमारास अर्टिगा कारने महामार्गावर काम करणाऱ्या जेसीबीला जोरदार धडक दिल्याने अपघात झाला. या अपघातात कारमधील सौरभ भागोजी टोणे (वय २२, रा. कवठे महांकाळ, जि. सांगली) हे जखमी झाले असून त्यांना उपचारासाठी कळंबणी उपजिल्हा रुग्णालयात दाखल करण्यात आले.
मिळालेल्या प्राथमिक माहितीनुसार, बोरघर येथे मुंबई-गोवा महामार्गाच्या दुभाजकाच्या मध्यभागी झाडे लावण्यासाठी खड्डे काढण्याचे काम सुरू होते. या कामासाठी जेसीबी मशीन महामार्गावर कार्यरत होते. त्याचवेळी मुंबईहून चिपळूणच्या दिशेने जाणाऱ्या एमएच ०३ एफडी २४५२ क्रमांकाच्या अर्टिगा कारने जेसीबीला जोरदार धडक दिली.
धडकेनंतर कारचे मोठे नुकसान झाले. कारमधील सौरभ टोणे जखमी झाल्याने त्यांना तातडीने कळंबणी उपजिल्हा रुग्णालयात उपचारासाठी हलविण्यात आले. टोणे हे मूळचे कवठे महांकाळ, जिल्हा सांगली येथील असून ते महामार्गावरून पाटणच्या दिशेने जात असल्याची प्राथमिक माहिती आहे.
दरम्यान, महामार्गावर वाहतूक सुरू असतानाच खड्डे काढण्याचे काम सुरू असल्याने कामाच्या ठिकाणी वाहनचालकांच्या सुरक्षिततेसाठी आवश्यक उपाययोजना करण्यात आल्या होत्या का, याबाबत अद्याप स्पष्ट माहिती समोर आलेली नाही. वाहतूक सुरक्षितपणे वळविण्यासाठी बॅरिकेड्स, दिशादर्शक फलक किंवा इतर सुरक्षा व्यवस्था करण्यात आली होती का, याबाबतही प्रश्न उपस्थित झाले आहेत.
महामार्गावरील सुरू असलेल्या कामांच्या ठिकाणी वाहनचालकांना पूर्वसूचना मिळणे आणि आवश्यक सुरक्षा उपाययोजना करणे महत्त्वाचे असते. त्यामुळे या अपघाताच्या पार्श्वभूमीवर संबंधित यंत्रणेकडून कामाच्या ठिकाणी करण्यात आलेल्या सुरक्षा व्यवस्थेची पाहणी होणे अपेक्षित आहे.
या अपघातात सुदैवाने मोठी जीवितहानी टळली. मात्र, महामार्गावरील कामांच्या ठिकाणी सुरक्षिततेच्या उपाययोजनांचा प्रश्न पुन्हा ऐरणीवर आला आहे. अपघाताचे नेमके कारण तसेच कामाच्या ठिकाणी करण्यात आलेल्या सुरक्षा व्यवस्थेबाबत अधिकृत माहिती तपासानंतरच स्पष्ट होणार आहे. :::
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
