दापोली तालुक्यातील दाभोळ दापोली रोडवर असलेल्या वळणे येथील हॉटेल येथे बार सुरू आहे का, अशी विचारणा केल्यानंतर झालेल्या वादाचे पर्यवसान मारहाणीत झाले. चारचाकी वाहनातील व्यक्तींनी शिवीगाळ व दमदाटी केल्यानंतर गाडीच्या जॅकचा रॉड काढून डोक्यात मारून दुखापत केल्याचा आरोप करण्यात आला आहे. या प्रकरणी दापोली पोलिसांनी तिघांविरोधात गुन्हा दाखल केला आहे.
ही घटना 14 ऑगस्ट 2026 रोजी रात्री सुमारे 8.45 वाजण्याच्या सुमारास हॉटेल व्होल्गा, वळणे येथे घडली. याप्रकरणी महादेव लाया दोरकलकर (वय 40, व्यवसाय खासगी नोकरी, रा. व्होल्गा हॉटेल वळणे, मूळ रा. हर्णे मलखांब पेठ, ता. दापोली) यांनी दापोली पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, घटनेच्या वेळी फिर्यादी महादेव दोरकलकर हे आपल्या पत्नी सुप्रिया आणि मुलगी कशिश कैलास कदम यांच्यासोबत हॉटेल येथे होते. त्यावेळी एक चारचाकी वाहन हॉटेलच्या गेटमध्ये आले. वाहनातील व्यक्तींनी फिर्यादीकडे हॉटेलमध्ये बार सुरू आहे का, अशी विचारणा केली. त्यावर फिर्यादीने बार सुरू नसल्याचे सांगितले.
याचा आरोपींनी राग मनात धरल्याचा आरोप फिर्यादीने केला आहे. त्यानंतर आरोपींनी फिर्यादीला शिवीगाळ करण्यास सुरुवात केली तसेच दमदाटी केली. पुढे चारचाकी वाहन हॉटेलच्या गेटबाहेर नेण्यात आले.
या दरम्यान वाहनचालक अंकित जाधव, रा. तेरे-वायंगणी, ता. दापोली याने वाहनाचा जॅकचा रॉड काढला. त्याने फिर्यादीच्या डोक्याच्या डाव्या बाजूस या लोखंडी रॉडने मारल्याने त्यांना दुखापत झाल्याचे फिर्यादीत नमूद करण्यात आले आहे.
या घटनेवेळी अंकित जाधव याच्यासोबत असलेले समेध रूखे आणि एका अज्ञात इसमाने फिर्यादी तसेच त्यांची पत्नी सुप्रिया आणि मुलगी कशिश यांना शिवीगाळ करून दमदाटी केली. तसेच त्यांना मारण्याची धमकी दिल्याचा आरोपही करण्यात आला आहे.
घटनेनंतर जखमी महादेव दोरकलकर यांना उपचारासाठी रुग्णालयात नेण्यात आले. दापोली पोलीस ठाण्यात प्राप्त झालेल्या एम.एल.सी.च्या आधारे या घटनेची नोंद करण्यात आली.
या प्रकरणी दापोली पोलीस ठाण्यात गुन्हा रजिस्टर क्रमांक 160/2026 दाखल करण्यात आला आहे. आरोपी अंकित जाधव, समेध रूखे आणि एका अज्ञात व्यक्तीविरोधात भारतीय न्यायसंहिता अधिनियम 2023 मधील कलम 118(1), 351(2), 352 आणि 3(5) अन्वये गुन्हा दाखल करण्यात आला आहे.
दरम्यान, या घटनेमागील नेमका वाद, मारहाणीची परिस्थिती आणि घटनेतील इतर बाबींचा पोलीस तपास करीत आहेत. या प्रकरणातील आरोपींवर पुढील कायदेशीर कारवाई सुरू असल्याची माहिती आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
