रत्नागिरी येथे एक धक्कादायक प्रकार समोर आला आहे. घरातील गणरायाचे विसर्जन करून कुटुंबीय आनंदाने घरी परतले; मात्र घरी आल्यानंतर अंगणात असलेले वडील दिसून न आल्याने सुरू झालेला शोध अखेर हृदयद्रावक घटनेने संपला. जुवे चव्हाणवाडी येथील सार्वजनिक विहिरीत बुडून ५९ वर्षीय व्यक्तीचा दुर्दैवी मृत्यू झाल्याची घटना २५ सप्टेंबर रोजी रात्री उघडकीस आली. चंद्रशेखर विनायक चव्हाण (वय ५९, रा. जुवे चव्हाणवाडी, ता. जि. रत्नागिरी) असे मृत व्यक्तीचे नाव आहे.
मिळालेल्या माहितीनुसार, २५ सप्टेंबर रोजी सायंकाळी साडेचारच्या सुमारास चंद्रशेखर चव्हाण यांचे कुटुंबीय तसेच वाडीतील नागरिक गणेश विसर्जनासाठी गेले होते. त्यावेळी चंद्रशेखर चव्हाण हे घराच्या अंगणातच होते. गणेश विसर्जनासाठी कुटुंबीय घराबाहेर गेले असताना ते घरीच थांबले होते.
विसर्जनाचा कार्यक्रम आटोपल्यानंतर रात्री सव्वाआठच्या सुमारास कुटुंबीय घरी परतले. मात्र, घरी आल्यानंतर चंद्रशेखर चव्हाण अंगणात दिसून आले नाहीत. सुरुवातीला ते आसपास कुठेतरी गेले असावेत, असा अंदाज कुटुंबीयांनी व्यक्त केला. मात्र, बराच वेळ शोध घेऊनही ते आढळून न आल्याने मुलगा अनमोल चव्हाण आणि त्यांच्या आईने परिसरात शोध सुरू केला.
शोध घेत असताना घरासमोरील वाडीतील सार्वजनिक विहिरीजवळ चंद्रशेखर चव्हाण यांच्या चपला, हातातील काठी आणि मोबाईल फोन आढळून आला. त्यामुळे ते विहिरीत पडले असावेत, असा संशय कुटुंबीयांना आला. त्यानंतर नातेवाईक आणि ग्रामस्थांनी सार्वजनिक विहिरीत शोधमोहीम सुरू केली.
शोध घेत असताना विहिरीच्या पाण्यात चंद्रशेखर चव्हाण यांचा मृतदेह आढळून आला. घटनेची माहिती मिळताच त्यांचे चुलत भाऊ विनायक मारुती चव्हाण यांनी विहिरीत उतरून त्यांना बाहेर काढले. त्यानंतर चंद्रशेखर चव्हाण यांना तातडीने उपचारासाठी रत्नागिरी जिल्हा शासकीय रुग्णालयात दाखल करण्यात आले.
मात्र, रुग्णालयातील वैद्यकीय अधिकाऱ्यांनी तपासणी केल्यानंतर उपचार सुरू करण्यापूर्वीच त्यांचा मृत्यू झाल्याचे घोषित केले. गणेश विसर्जनाच्या दिवशीच घडलेल्या या दुर्दैवी घटनेने चव्हाण कुटुंबावर मोठा आघात झाला आहे.
या घटनेमुळे जुवे चव्हाणवाडी परिसरात हळहळ व्यक्त होत आहे. गणेश विसर्जनाचा कार्यक्रम आटोपून कुटुंबीय घरी परतल्यानंतर काही वेळातच चंद्रशेखर चव्हाण यांचा मृतदेह सार्वजनिक विहिरीत आढळल्याने परिसरात शोककळा पसरली.
या प्रकरणी मृताचे पुत्र अनमोल चव्हाण यांनी दिलेल्या खबरीवरून रत्नागिरी शहर पोलीस ठाण्यात भारतीय नागरिक सुरक्षा संहिता (BNSS) कलम १९४ अन्वये अकस्मात मृत्यू क्रमांक १२०/२०२६ अशी नोंद करण्यात आली आहे. घटनेचा पुढील तपास तसेच आवश्यक कायदेशीर प्रक्रिया रत्नागिरी शहर पोलीस ठाण्याकडून सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
