रत्नागिरी : रत्नागिरी शहराच्या पाणीपुरवठ्याबाबत प्रशासनाने महत्त्वाचा निर्णय घेतला असून, सोमवारपासून शहराचा पाणीपुरवठा पूर्णपणे बंद ठेवण्यात येणार आहे. यापुढे प्रत्येक सोमवारी हा निर्णय लागू राहणार आहे. दिवाळी सणाच्या पार्श्वभूमीवर गेल्या सोमवारी (९ नोव्हेंबर) नागरिकांची गैरसोय टाळण्यासाठी नियमित पाणीपुरवठा करण्यात आला होता. मात्र, सणासुदीचा काळ संपल्याने आता दर सोमवारी पाणीपुरवठा बंद ठेवण्याचे पूर्वीचे धोरण पुन्हा सुरू करण्यात आले आहे. पाणी समितीचे सभापती निमेश नायर यांनी ही माहिती दिली.
रत्नागिरी शहरातील उपलब्ध पाणीसाठ्याचे योग्य नियोजन व्हावे आणि आगामी काळात संभाव्य पाणीटंचाई निर्माण होऊ नये, यासाठी प्रशासनाने १२ ऑक्टोबरपासून प्रत्येक सोमवारी पाणीपुरवठा बंद ठेवण्याचा निर्णय घेतला होता. त्यानुसार या निर्णयाची अंमलबजावणी सुरू होती. मात्र, दिवाळी सणाच्या काळात नागरिकांना पुरेसे पाणी उपलब्ध व्हावे, यासाठी ९ नोव्हेंबर रोजी सोमवारी नियमित पाणीपुरवठा करण्यात आला. आता दिवाळी संपल्यानंतर पुन्हा एकदा पाणीपुरवठा बंद ठेवण्याचे नियोजन लागू करण्यात आले आहे.
शीळ धरणातील पाणीसाठ्याचे नियोजन
रत्नागिरी शहराला पाणीपुरवठा करणाऱ्या शीळ धरणातील उपलब्ध जलसाठ्याचा विचार करून हा निर्णय घेण्यात आला आहे. १२ ऑक्टोबर रोजी दर सोमवारी पाणीपुरवठा बंद ठेवण्याचा निर्णय घेतला, त्यावेळी धरणात ९९.७३ टक्के पाणीसाठा उपलब्ध होता.
दरम्यान, काही आठवड्यांपूर्वी झालेल्या परतीच्या पावसामुळे शीळ धरणाच्या पाणीसाठ्यात ०.०४ दशलक्ष घनमीटरने वाढ झाली होती. त्यामुळे दिवाळीच्या काळात एका सोमवारी नियमित पाणीपुरवठा केल्याचा धरणातील एकूण जलसाठ्यावर फारसा परिणाम झाला नसल्याचे सांगण्यात आले. तरीही आगामी काळातील पाण्याची गरज लक्षात घेता उपलब्ध जलसाठ्याचा समतोल राखण्यासाठी दर सोमवारी पाणीपुरवठा बंद ठेवण्याचा निर्णय कायम ठेवण्यात आला आहे.
नगरपरिषद प्रशासनाने नागरिकांना पाण्याचा वापर जपून आणि काटकसरीने करण्याचे आवाहन केले आहे. त्यामुळे सोमवारी होणारा पाणीपुरवठा बंद लक्षात घेऊन नागरिकांनी आवश्यक पाण्याचा साठा करून ठेवावा, असे आवाहनही करण्यात येत आहे.

वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*













