संगमेश्वर शहरातील रफीक मार्ट किराणा दुकानात अज्ञात चोरट्याने डल्ला मारत सुमारे ₹६०,३४० किमतीचा किराणामाल लंपास केल्याची घटना उघडकीस आली आहे. या प्रकरणी संगमेश्वर पोलीस ठाण्यात अज्ञात चोरट्याविरोधात भारतीय न्याय संहिता (BNS) २०२३ अंतर्गत गुन्हा दाखल करण्यात आला असून, पोलिसांनी तपास सुरू केला आहे.
पोलिसांनी दिलेल्या माहितीनुसार, ही चोरी २५ जुलै २०२६ रोजी रात्री १०.०० ते २६ जुलै २०२६ रोजी सकाळी ८.३० या कालावधीत घडली. फिर्यादी मुमताज रफिक मेमन (वय ४६, रा. कसबा उभा मोहल्ला, ता. संगमेश्वर) यांच्या मालकीच्या रफीक मार्ट किराणा दुकानात अज्ञात चोरट्याने प्रवेश करून त्यांच्या संमतीशिवाय दुकानातील विविध किराणा वस्तू चोरून नेल्या.
चोरीस गेलेल्या मालामध्ये ५० किलो वजनाची साखरेची दोन पोती (₹४,०००), ३५ किलो वजनाची मिरचीची दोन पोती (₹१६,०००), ३० किलो वजनाची जिऱ्याची एक बॅग (₹६,०००), जेमिनी सनफ्लॉवर तेलाचे पाच बॉक्स (₹१०,२००), राजा सोया तेलाच्या चार बरण्या (₹८,८००), जेमिनी सनफ्लॉवर तेलाच्या तीन बरण्या (₹७,७४०) तसेच ₹७,६०० किमतीचा इतर किराणामाल असा एकूण ₹६०,३४० किमतीचा माल चोरीस गेला आहे.
या घटनेमुळे व्यापाऱ्यांमध्ये चिंतेचे वातावरण निर्माण झाले असून, वाढत्या चोरीच्या घटनांमुळे बाजारपेठेतील सुरक्षेचा प्रश्न पुन्हा ऐरणीवर आला आहे. या प्रकरणी संगमेश्वर पोलीस ठाण्यात अज्ञात चोरट्याविरोधात गुन्हा दाखल करण्यात आला असून, सीसीटीव्ही फुटेज आणि इतर तांत्रिक पुराव्यांच्या आधारे चोरट्याचा शोध घेण्याचे काम सुरू असल्याची माहिती पोलिसांनी दिली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
