रत्नागिरी शहरात ऑनलाईन शेअर मार्केट ट्रेडिंगच्या नावाखाली मोठा परतावा मिळवून देण्याचे आमिष दाखवत तब्बल ९० लाख १ हजार ३०० रुपयांची फसवणूक झाल्याचा गंभीर प्रकार समोर आला आहे. या प्रकरणात २१ वर्षीय तरुण आणि त्याच्या वडिलांना लक्ष्य करण्यात आले असून, रत्नागिरी शहर पोलीस ठाण्यात ठाणे येथील संशयित आरोपीविरुद्ध गुन्हा दाखल करण्यात आला आहे.
माहितीनुसार, रत्नागिरीतील ओसवालनगर परिसरातील अर्कान विल्ला येथे राहणारे महमद अयाद अजीज वागळे (वय २१) आणि त्यांचे वडील यांना फैजान नुख्द्दीन शेख (रा. अमृतनगर, ठाणे) याने संपर्क साधला. शेअर मार्केटमध्ये गुंतवणूक केल्यास अल्पावधीत मोठा नफा मिळेल, असे सांगत त्याने त्यांना चार महिन्यांच्या विशेष योजनेची माहिती दिली. आकर्षक परताव्याचे आश्वासन देत आणि विविध बहाण्यांनी विश्वास संपादन करत त्याने वागळे कुटुंबीयांना गुंतवणुकीस प्रवृत्त केले.
संशयिताच्या बोलण्यावर विश्वास ठेवून फिर्यादी व त्यांच्या वडिलांनी ४ नोव्हेंबर २०२४ ते ३ ऑगस्ट २०२५ या कालावधीत वेळोवेळी मोठ्या रकमा ऑनलाईन ट्रान्सफरद्वारे तसेच इतर माध्यमांतून दिल्या. या कालावधीत एकूण ९० लाख १ हजार ३०० रुपये आरोपीकडे जमा झाले.
मात्र, ठरलेल्या कालावधीनंतरही कोणताही परतावा मिळाला नाही. उलट, आरोपीकडून टाळाटाळ सुरू झाली. सतत संपर्क साधण्याचा प्रयत्न करूनही समाधानकारक उत्तर मिळत नसल्याने आणि मूळ रक्कमही परत न मिळाल्याने वागळे कुटुंबीयांना आपली फसवणूक झाल्याची खात्री पटली.
यानंतर महमद वागळे यांनी १८ एप्रिल २०२६ रोजी रात्री उशिरा रत्नागिरी शहर पोलीस ठाण्यात तक्रार दाखल केली. या तक्रारीच्या आधारे पोलिसांनी फैजान शेख याच्याविरुद्ध भारतीय न्याय संहिता (BNS) २०२३ च्या कलम ३१८(२) आणि ३१८(४) अन्वये गुन्हा नोंदवला आहे.
सध्या या प्रकरणाचा अधिक तपास पोलीस करत असून, आरोपीचा माग काढण्याचे प्रयत्न सुरू आहेत. तसेच आर्थिक व्यवहारांचे तपशील, बँक खात्यांची माहिती आणि ऑनलाईन व्यवहारांचा मागोवा घेतला जात आहे.
दरम्यान, पोलिसांनी नागरिकांना आवाहन केले आहे की, शेअर मार्केट किंवा अन्य कोणत्याही गुंतवणुकीत ‘जलद आणि हमखास नफा’ देण्याचे आश्वासन देणाऱ्या व्यक्तींवर विश्वास ठेवू नये. अधिकृत व नोंदणीकृत माध्यमांद्वारेच गुंतवणूक करावी आणि कोणतीही शंका असल्यास तत्काळ संबंधित यंत्रणांशी संपर्क साधावा.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
