रत्नागिरी शहरातील थिबा पॅलेस रोड परिसरात रविवारी मध्यरात्री एका भरधाव कारचा ताबा सुटल्याने एकापाठोपाठ अनेक ठिकाणी धडक देत मोठे नुकसान झाल्याची घटना घडली. या प्रकारामुळे परिसरात काही काळ घबराट निर्माण झाली. या प्रकरणी कारचालक सचिन नाना बुलाखे याच्याविरोधात रत्नागिरी शहर पोलिस ठाण्यात अदखलपात्र गुन्ह्याची नोंद करण्यात आली आहे.
पोलिसांकडून मिळालेल्या माहितीनुसार, २० सप्टेंबर २०२६ रोजी रात्री साडेअकराच्या सुमारास अमानत बंगल्यासमोरील मुख्य रस्त्यावर हा प्रकार घडला. तक्रारदाराच्या म्हणण्यानुसार, सचिन बुलाखे हा एमएच ०२ डीझेड ५९४१ क्रमांकाची कार मथुरा हॉटेलकडून चंद्रशेखर डेअरीच्या दिशेने भरधाव वेगाने आणि निष्काळजीपणे चालवत होता.
याचदरम्यान कारचालकाचा वाहनावरील ताबा सुटला. अनियंत्रित झालेल्या कारने सर्वप्रथम रस्त्यालगत असलेल्या जिओ कंपनीच्या पोलला जोरदार धडक दिली. त्यानंतर कार पुढे जाऊन एका बंगल्याच्या मुख्य गेटवर आणि कंपाऊंड वॉलवर आदळली.
धडकांची मालिका एवढ्यावरच थांबली नाही. अनियंत्रित कारने रस्त्यालगत उभ्या असलेल्या एमएच ४३ एएन ९९९७ क्रमांकाच्या अल्टो कारलाही जोरदार धडक दिली. या घटनेत पोल, बंगल्याचे गेट व कंपाऊंड वॉलचे नुकसान झाले. तसेच अल्टो कारचेही नुकसान झाल्याचे समोर आले आहे.
या घटनेनंतर स्थानिक रहिवाशाने रत्नागिरी शहर पोलिस ठाण्यात फिर्याद दाखल केली. अल्टो कारच्या मालकाने या घटनेबाबत स्वतंत्र तक्रार दाखल केलेली नसल्याचे पोलिसांनी नमूद केले आहे.
या प्रकरणी पोलिसांनी भारतीय न्याय संहितेच्या कलम ३२४(४) अन्वये नोंद केली आहे. पुढील कायदेशीर प्रक्रियेसाठी तक्रारदाराला न्यायालयात दाद मागण्याबाबत समज देण्यात आली आहे. या प्रकरणाचा पुढील तपास पोलीस हवालदार जाधव करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
