खेड तालुक्यातील लोटे एमआयडीसी परिसरातील एम.आर. स्पेशालिटी केमिकल्स प्रायव्हेट लिमिटेड या कंपनीत शनिवार, १० ऑक्टोबर रोजी सकाळी सुमारे ९ वाजण्याच्या सुमारास भीषण आग लागल्याची घटना घडली. या आगीत लाखो रुपयांचे नुकसान झाल्याचा प्राथमिक अंदाज व्यक्त करण्यात येत असून, काही कर्मचाऱ्यांना किरकोळ दुखापत झाल्याची माहिती समोर आली आहे.
कंपनीत आग लागल्याचे निदर्शनास येताच परिसरात एकच खळबळ उडाली. घटनेची माहिती मिळताच अग्निशमन दलाने तातडीने घटनास्थळी धाव घेत आग आटोक्यात आणण्यासाठी प्रयत्न केले. अग्निशमन दलाच्या तत्परतेमुळे आगीवर नियंत्रण मिळवण्यात आल्याची माहिती आहे. मात्र, आगीमुळे कंपनीचे नेमके किती नुकसान झाले, याचा अधिकृत तपशील अद्याप समोर आलेला नाही.
दरम्यान, या दुर्घटनेची दखल घेत महाराष्ट्र प्रदूषण नियंत्रण मंडळ आणि खेड पोलिसांकडून तपास सुरू असल्याची माहिती मिळत आहे. आगीचे नेमके कारण काय, कंपनीतील सुरक्षा व्यवस्थेत काही त्रुटी होत्या का आणि दुर्घटनेमुळे पर्यावरणावर काही परिणाम झाला आहे का, याबाबत तपासानंतरच स्पष्टता येणार आहे.
विशेष म्हणजे, या घटनेनंतर कंपनी व्यवस्थापनाकडून अधिकृत माहिती समोर आलेली नाही. त्यामुळे आगीचे स्वरूप, नुकसानीचा आकडा आणि जखमी कर्मचाऱ्यांची नेमकी स्थिती याबाबत अधिकृत माहितीची प्रतीक्षा आहे.
लोटे एमआयडीसी परिसरात वारंवार घडणाऱ्या औद्योगिक दुर्घटनांमुळे औद्योगिक सुरक्षेचा प्रश्न पुन्हा एकदा ऐरणीवर आला आहे. कंपन्यांमधील अग्निसुरक्षा यंत्रणा, आपत्कालीन उपाययोजना आणि कामगारांच्या सुरक्षिततेबाबत संबंधित यंत्रणांनी अधिक दक्ष राहण्याची गरज व्यक्त होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
