संगमेश्वर तालुक्यातील हरपुडे गावातील खालची घुगवाडी येथे शेतातील काम करताना पायावर कुऱ्हाडीचा घाव लागल्याने गंभीर जखमी झालेल्या ६५ वर्षीय वृद्धाचा उपचारादरम्यान दुर्दैवी मृत्यू झाला. या घटनेमुळे परिसरात हळहळ व्यक्त होत असून बाईत कुटुंबावर दुःखाचा डोंगर कोसळला आहे.
मृत वृद्धाचे नाव तुकाराम गंगाराम बाईत (वय ६५, रा. हरपुडे, खालची घुगवाडी, ता. संगमेश्वर) असे आहे.
मिळालेल्या माहितीनुसार, तुकाराम बाईत हे त्यांच्या स्वमालकीच्या शेतात काजूच्या झाडांना खत घालण्याचे काम करत होते. काम सुरू असताना अचानक कुऱ्हाडीचा घाव त्यांच्या पायावर बसला. या अपघातात ते गंभीर जखमी झाले आणि मोठ्या प्रमाणात रक्तस्त्राव होऊ लागला. कुटुंबीयांनी त्यांना तातडीने देवरूख ग्रामीण रुग्णालयात उपचारासाठी दाखल केले.
रुग्णालयात वैद्यकीय अधिकाऱ्यांनी त्यांच्या जखमेवर टाके घालून आवश्यक उपचार केले. प्रकृती स्थिर असल्याचे वाटल्याने उपचारानंतर त्यांना घरी सोडण्यात आले. मात्र, घरी परतल्यानंतर जेवण झाल्यावर त्यांची प्रकृती अचानक बिघडली. त्यांना पुन्हा तातडीने देवरूख ग्रामीण रुग्णालयात नेण्यात आले. तेथे तपासणीअंती वैद्यकीय अधिकाऱ्यांनी त्यांना मृत घोषित केले.
घटनेची माहिती मिळताच संबंधित यंत्रणेने आवश्यक कार्यवाही केली. शवविच्छेदनानंतर मृतदेह नातेवाईकांच्या ताब्यात देण्यात आला. मंगळवारी शोकाकुल वातावरणात त्यांच्यावर अंत्यसंस्कार करण्यात आले.
तुकाराम बाईत यांच्या पश्चात पत्नी, तीन मुलगे, एक मुलगी, सुना, जावई आणि नातवंडे असा मोठा परिवार आहे. त्यांच्या अकस्मात निधनामुळे हरपुडे परिसरात शोककळा पसरली असून ग्रामस्थांकडून त्यांना भावपूर्ण श्रद्धांजली अर्पण करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
