रत्नागिरी शहरातील कोकणनगर परिसरात घरफोडीची घटना उघडकीस आली असून, अज्ञात चोरट्याने घरातील कपाटाच्या लॉकरमधून सोन्याचे दागिने आणि रोख रक्कम असा एकूण ४ लाख ७२ हजार रुपये किमतीचा मुद्देमाल लंपास केला आहे. प्रज्ञा हॉस्पिटलजवळील घरात ही चोरी झाली. याप्रकरणी रत्नागिरी शहर पोलीस ठाण्यात अज्ञात चोरट्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, नझीर अब्दुल्ला वणू (वय ६२, रा. घर क्रमांक ७५०/बी/५, कोकणनगर, रत्नागिरी) यांच्या राहत्या घरी ही चोरी झाली. १५ सप्टेंबर २०२६ ते ३१ ऑक्टोबर २०२६ या कालावधीत अज्ञात व्यक्तीने घरातील बेडरूममध्ये असलेल्या कपाटाच्या लॉकरमधील ऐवजावर डल्ला मारला.
विशेष म्हणजे, चोरट्याने लॉकर फोडण्याऐवजी त्याच ठिकाणी ठेवलेली लॉकरची चावी वापरून तो उघडला. त्यानंतर लॉकरमधील सोन्याचे विविध दागिने आणि रोख रक्कम चोरून नेली. चोरी झाल्याचे लक्षात आल्यानंतर फिर्यादी यांनी पोलिसांत तक्रार दाखल केली.
चोरीला गेलेला मुद्देमाल असा :
- २२ हजार रुपये रोख.
- १ लाख २० हजार रुपये किमतीचा चार तोळे वजनाचा सोन्याचा हार.
- १ लाख १० हजार रुपये किमतीचा साडेतीन तोळे वजनाचा रोडियम सोन्याचा हार.
- ४० हजार रुपये किमतीची १० ग्रॅम वजनाची सोन्याची चेन.
- १ लाख रुपये किमतीचे साडेतीन तोळे वजनाचे दोन सोन्याचे कडे.
- ६० हजार रुपये किमतीची चार सोन्याची कर्णफुले व दोन सोन्याच्या रिंगा.
- १० हजार रुपये किमतीच्या दोन ग्रॅम वजनाच्या सोन्याच्या छोट्या रिंगा.
- १० हजार रुपये किमतीचे दोन ग्रॅम वजनाचे सोन्याचे कॉईन.
अशा प्रकारे रोख रकमेसह एकूण ४ लाख ७२ हजार रुपये किमतीचा मुद्देमाल चोरीला गेला आहे.
या प्रकरणी नझीर अब्दुल्ला वणू यांनी दिलेल्या फिर्यादीवरून १३ नोव्हेंबर २०२६ रोजी दुपारी १२.०१ वाजता रत्नागिरी शहर पोलीस ठाण्यात गुन्हा रजिस्टर क्रमांक ४६५/२०२६ अन्वये भारतीय न्याय संहिता २०२३ चे कलम ३०५(अ) प्रमाणे अज्ञात आरोपीविरोधात गुन्हा दाखल करण्यात आला आहे.
दरम्यान, लॉकरची चावी वापरून चोरी करण्यात आल्याने चोरट्याला घरातील चावीच्या ठिकाणाची माहिती होती का, या दृष्टीनेही तपासाची शक्यता आहे. मात्र, चोरीमागे माहितीगार व्यक्तीचा हात असल्याचे अद्याप स्पष्ट झालेले नाही. रत्नागिरी शहर पोलीस या घटनेचा पुढील तपास करीत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
