दापोली तालुक्यातील गावतळे येथे सलूनमध्ये ग्राहकाची दाढी करत असलेल्या तरुणावर एका व्यक्तीने लाकडी रिपेने हल्ला करून मारहाण केल्याची घटना गुरुवारी (१९ नोव्हेंबर २०२६) दुपारी घडली. या हल्ल्यात सलून व्यावसायिक शुभम संतोष शिंदे (वय ३०, रा. गावतळे) यांच्या पाठीवर तसेच डाव्या हातावर दुखापत झाली आहे. याशिवाय संशयिताने शिवीगाळ करून जीवे मारण्याची धमकी दिल्याचा आरोपही तक्रारीत करण्यात आला आहे. या घटनेमुळे गावतळे परिसरात चर्चा सुरू झाली आहे.

दापोली पोलिसांनी दिलेल्या माहितीनुसार, शुभम शिंदे यांचे गावतळे येथे सलून असून, गुरुवारी दुपारी सुमारे १.१५ वाजण्याच्या सुमारास ते नेहमीप्रमाणे व्यवसाय करत होते. त्यावेळी सलूनमध्ये एका ग्राहकाची दाढी करण्याचे काम सुरू होते. याच दरम्यान संशयित सौरभ भागूराम म्हाब्दी हा दारूच्या नशेत सलूनमध्ये आला.

सलूनमध्ये आल्यानंतर संशयिताने हातातील लाकडी रिपेने शुभम शिंदे यांच्या पाठीवर आणि डाव्या हातावर मारहाण केल्याचे तक्रारीत नमूद करण्यात आले आहे. अचानक झालेल्या या हल्ल्यामुळे सलूनमधील वातावरण तणावपूर्ण झाले. मारहाण करताना संशयिताने शुभम यांना शिवीगाळ केली तसेच जीवे मारण्याची धमकी दिल्याचाही आरोप आहे.

या घटनेमागे जुन्या वादाची पार्श्वभूमी असल्याचे तक्रारदाराने पोलिसांना दिलेल्या जबाबात म्हटले आहे. १५ नोव्हेंबर रोजीही संशयिताने जुन्या वादातून शुभम शिंदे यांच्या कुटुंबीयांना त्रास दिला होता. तसेच त्यांच्या वडिलांना धमकावल्याचा उल्लेखही तक्रारीत करण्यात आला आहे. याच पूर्वीच्या वादातून गुरुवारी सलूनमध्ये येऊन मारहाण करण्यात आल्याचे शुभम शिंदे यांनी तक्रारीत म्हटले आहे.
सलूनमध्ये सुरू असलेल्या मारहाणीच्या वेळी परिसरातील काही नागरिकांनी तातडीने हस्तक्षेप केला. त्यांनी मध्यस्थी करून शुभम शिंदे यांची संशयिताच्या तावडीतून सुटका केली. त्यानंतर जखमी शुभम यांना उपचारासाठी गावातील डॉक्टरांकडे नेण्यात आले.
या प्रकरणी शुभम संतोष शिंदे यांनी दापोली पोलीस ठाण्यात तक्रार दाखल केली आहे. त्यांच्या तक्रारीवरून संशयित सौरभ भागूराम म्हाब्दी याच्याविरोधात भारतीय न्याय संहिता २०२३ मधील कलम ११८(१), ३५१(२) आणि ३५२ अन्वये गुन्हा दाखल करण्यात आला आहे.
या प्रकरणाचा पुढील तपास हेड कॉन्स्टेबल साक्षी गुजर करत आहेत. जुन्या वादातून झालेल्या या प्रकारामुळे सार्वजनिक ठिकाणी व्यवसाय करणाऱ्या व्यावसायिकांच्या सुरक्षिततेचा प्रश्न पुन्हा चर्चेत आला आहे.

वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*











