संगमेश्वर तालुक्यातील चाफवली उगवतीवाडी येथे ४५ वर्षीय व्यक्तीने गळफास घेऊन आत्महत्या केल्याची घटना १८ नोव्हेंबर रोजी सकाळी उघडकीस आली. विलास दत्ताराम गावडे (वय ४५, रा. चाफवली उगवतीवाडी, ता. संगमेश्वर) असे मृत व्यक्तीचे नाव आहे. या घटनेमुळे परिसरात हळहळ व्यक्त होत आहे.
पोलिसांनी दिलेल्या माहितीनुसार, १८ नोव्हेंबर रोजी सकाळी पावणेदहा वाजण्याच्या सुमारास विलास गावडे हे गुरांना खायला घालण्यासाठी जात असल्याचे सांगून घरातून बाहेर पडले होते. बराच वेळ होऊनही ते घरी परतले नाहीत. त्यामुळे त्यांचा शोध घेतला असता, घराशेजारील वाड्यालगत असलेल्या फणसाच्या झाडाला नायलॉन दोरीच्या साहाय्याने गळफास घेतलेल्या अवस्थेत ते आढळून आले.
घटनेची माहिती मिळताच ग्रामस्थ आणि नातेवाईकांनी घटनास्थळी धाव घेतली. त्यांनी विलास गावडे यांना खाली उतरवून तातडीने देवळे येथील प्राथमिक आरोग्य केंद्रात दाखल केले. मात्र, तेथील वैद्यकीय अधिकाऱ्यांनी तपासणीनंतर त्यांना मृत घोषित केले.
या घटनेची देवरूख पोलीस ठाण्यात आकस्मिक मृत्यू क्रमांक ५१/२०२६ अन्वये भारतीय नागरिक सुरक्षा संहिता कलम १९४ प्रमाणे १८ नोव्हेंबर रोजी दुपारी १२.५४ वाजता नोंद करण्यात आली आहे. विलास गावडे यांनी आत्महत्या करण्यामागील कारण अद्याप स्पष्ट झालेले नाही. या प्रकरणी देवरूख पोलीस पुढील कार्यवाही करत आहेत.

वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*













