रत्नागिरी जिल्ह्यातील गुहागर तालुक्यात घरफोडीची गंभीर घटना घडली असून अज्ञात चोरट्यांनी घरात घुसून लाखोंचा ऐवज लंपास केला आहे.
गुहागर खालचापाट येथे राहणारे रविंद्र शरद शिंदे (वय ४९), व्यवसायाने गॅरेज चालक, हे कामानिमित्त कल्याण (जि. ठाणे) येथे गेले होते. त्यांच्या अनुपस्थितीचा फायदा घेत अज्ञात चोरट्यांनी ३० एप्रिल २०२६ रोजी पहाटे २ ते ४ या वेळेत त्यांच्या राहत्या घरावर डल्ला मारला.
चोरट्यांनी घराच्या मुख्य दरवाज्याची कडी कोणत्यातरी हत्याराने तोडून दरवाजाचे कुलूप उचकटले व घरात प्रवेश केला. त्यानंतर बेडरूममधील लोखंडी कपाटाचे कुलूप तोडून आत ठेवलेला लॉकर उघडण्यात आला. लॉकरमधून लग्नात वापरलेले सोन्याचे दागिने, रोख रक्कम तसेच WiFi राऊटर असा एकूण २ लाख ३१ हजार ५०० रुपयांचा मुद्देमाल चोरून नेण्यात आला.
चोरी गेलेल्या ऐवजात सुमारे १२ ग्रॅम वजनाची सोन्याची चैन (₹५०,०००), २० ग्रॅमचे मणीमंगळसूत्र (₹८०,०००), ८ ग्रॅमच्या अंगठ्या (₹४०,०००), रोख ₹६०,००० आणि ₹१,५०० किंमतीचा WiFi राऊटर यांचा समावेश आहे.
घटनेची माहिती मिळताच रविंद्र शिंदे हे कल्याणहून आपल्या गावी परतले आणि त्यांनी गुहागर पोलिस ठाण्यात फिर्याद दिली. त्यांच्या तक्रारीवरून भारतीय न्यायसंहिता २०२३ मधील कलम ३३१(४) व ३०५(अ) अन्वये अज्ञात आरोपीविरुद्ध गुन्हा क्रमांक ३१/२०२६ दाखल करण्यात आला आहे. हा गुन्हा १ मे २०२६ रोजी दुपारी ३.०६ वाजता नोंदविण्यात आला.
दरम्यान, पोलिसांनी घटनास्थळी पंचनामा करून तपास सुरू केला असून परिसरातील सीसीटीव्ही फुटेजची पाहणी तसेच संशयितांचा शोध सुरू आहे. या घटनेमुळे गुहागर परिसरात भीतीचे वातावरण निर्माण झाले असून नागरिकांनी घराची सुरक्षितता वाढवण्याचे आवाहन पोलिसांकडून करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
