रत्नागिरी–नागपूर महामार्गावर संगमेश्वर तालुक्यातील देवळे फाटा येथे घडलेल्या भीषण अपघातात रिक्षाचालकाचा मृत्यू झाला असून या प्रकरणातील फरार वाहनचालकाला देवरूख व साखरपा पोलिसांनी अवघ्या दोन तासांत अटक करून ताब्यात घेतले आहे. पोलिसांच्या या तत्पर कारवाईचे सर्वत्र कौतुक होत आहे.
मिळालेल्या माहितीनुसार, चाफवली येथील रिक्षाचालक विजय पांडुरंग कांबळे (वय ६२) हे देवळे फाटा येथे आपल्या रिक्षासह प्रवाशांची वाट पाहत उभे होते. यावेळी मागून भरधाव वेगाने येणाऱ्या एका चारचाकी वाहनाने त्यांच्या रिक्षाला जोरदार धडक दिली. धडकेची तीव्रता इतकी मोठी होती की रिक्षा सुमारे दहा फूट दूर फेकली गेली. या अपघातात कांबळे गंभीर जखमी झाले आणि त्यांचा जागीच मृत्यू झाला.
अपघात घडल्यानंतर संबंधित वाहनचालक घटनास्थळावरून फरार झाला. त्यामुळे काही काळ परिसरात तणावाचे वातावरण निर्माण झाले होते. घटनेची माहिती मिळताच देवरूख व साखरपा पोलिसांनी तातडीने घटनास्थळी धाव घेतली व पंचनामा करून पुढील तपास सुरू केला.
तपासादरम्यान पोलिसांनी परिसरातील सीसीटीव्ही फुटेजची पाहणी केली. या फुटेजच्या आधारे संशयित स्कॉर्पिओ (एमएच ०९ जीए ६८८६) या वाहनाची ओळख पटली. त्यानंतर पोलिसांनी तातडीने शोधमोहीम हाती घेत विविध ठिकाणी नाकाबंदी केली.
शोधमोहीम सुरू असताना आंबा घाट परिसरात संबंधित वाहन असल्याची माहिती पोलिसांना मिळाली. त्या आधारे पोलिसांनी सापळा रचत अवघ्या दोन तासांत चालकाला ताब्यात घेतले. त्याच्याकडून पुढील चौकशी सुरू असून अपघातास कारणीभूत असलेल्या घटनेबाबत अधिक माहिती घेण्यात येत आहे.
ही कारवाई देवरूख पोलीस ठाण्याचे पोलीस निरीक्षक उदय झावरे यांच्या मार्गदर्शनाखाली साखरपा पोलीस दूरक्षेत्राचे पोलीस उपनिरीक्षक प्रमोद वाघाटे, सहाय्यक पोलीस फौजदार शांताराम पंदेरे, हेड कॉन्स्टेबल गणेश सुतार, चालक कांबळे, पोलीस हेड कॉन्स्टेबल सचिन कामेरकर, सचिन पवार यांच्या पथकाने केली. या कारवाईत पोलीस मित्र सुभाष सुर्वे यांनीही मोलाची मदत केली.
दरम्यान, या अपघातामुळे परिसरात हळहळ व्यक्त होत असून नागरिकांनी महामार्गावरील वाढत्या वेगावर नियंत्रण ठेवण्याची मागणी केली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
