रत्नागिरी : केंद्र सरकारच्या वतीने राबविण्यात आलेल्या ‘स्वच्छ सर्वेक्षण २०२५-२६’ मध्ये रत्नागिरी शहराने राष्ट्रीय स्तरावर उल्लेखनीय यश संपादन केले आहे. देशातील किनारपट्टीवरील शहरांच्या श्रेणीत रत्नागिरीने तृतीय क्रमांक पटकावत संपूर्ण कोकणाच्या शिरपेचात मानाचा तुरा रोवला आहे. नवी दिल्ली येथे बुधवारी आयोजित भव्य राष्ट्रीय पुरस्कार सोहळ्यात राष्ट्रपती द्रौपदी मुर्मू यांच्या हस्ते रत्नागिरी नगरपरिषदेला हा प्रतिष्ठेचा पुरस्कार प्रदान करण्यात आला.
या राष्ट्रीय सन्मानामुळे रत्नागिरी शहराच्या स्वच्छता मोहिमेला देशपातळीवर मान्यता मिळाली आहे. नवी दिल्ली येथे झालेल्या पुरस्कार वितरण सोहळ्यात रत्नागिरी नगरपरिषदेच्या वतीने नगराध्यक्ष शिल्पा सुर्वे, मुख्याधिकारी वैभव गारवे, उपनगराध्यक्ष समीर तिवरेकर, पाणीपुरवठा सभापती निमेश नायर आणि स्वच्छता सभापती राकेश नागवेकर यांनी मंचावर उपस्थित राहून हा पुरस्कार स्वीकारला.
रत्नागिरी शहराने स्वच्छतेच्या क्षेत्रात सातत्याने केलेल्या प्रयत्नांचे हे फलित मानले जात आहे. शहरातील घनकचरा व्यवस्थापन अधिक प्रभावी करण्यासोबतच समुद्रकिनारे आणि सार्वजनिक परिसर स्वच्छ ठेवण्यासाठी नगरपरिषदेने विशेष प्रयत्न केले. ओला आणि सुका कचरा वर्गीकरण, नियमित कचरा संकलन, सार्वजनिक ठिकाणांची स्वच्छता तसेच प्लास्टिकमुक्तीसाठी विविध उपक्रम राबविण्यात आले.
शहराच्या स्वच्छतेसाठी नगरपरिषद प्रशासनाने नियोजनबद्ध पद्धतीने काम केले. स्वच्छता कर्मचाऱ्यांनी प्रत्यक्ष मैदानात उतरून सातत्याने परिश्रम घेतले. त्याचबरोबर नागरिकांनीही स्वच्छता मोहिमेत सक्रिय सहभाग नोंदवला. प्रशासन आणि नागरिकांच्या समन्वयातून स्वच्छतेबाबत निर्माण झालेली जनजागृती या यशासाठी महत्त्वपूर्ण ठरली.
विशेषतः किनारपट्टीवरील शहर म्हणून रत्नागिरीसमोर समुद्रकिनारे स्वच्छ ठेवणे, पर्यटनस्थळांचे व्यवस्थापन करणे आणि सार्वजनिक परिसरातील कचऱ्याची योग्य विल्हेवाट लावणे अशी आव्हाने असतात. या पार्श्वभूमीवर देशातील किनारपट्टीवरील शहरांच्या श्रेणीत तृतीय क्रमांक मिळवणे ही रत्नागिरीसाठी महत्त्वाची उपलब्धी ठरली आहे.
या यशाबद्दल रत्नागिरी शहरासह संपूर्ण कोकणातून नगरपरिषद प्रशासन, लोकप्रतिनिधी, अधिकारी, कर्मचारी आणि स्वच्छता दूतांचे अभिनंदन होत आहे. या पुरस्कारामुळे स्वच्छ आणि सुंदर रत्नागिरी घडविण्याच्या संकल्पाला नवे बळ मिळाले असून, भविष्यातही शहराची स्वच्छता आणि पर्यावरण संवर्धनाची मोहीम अधिक प्रभावीपणे राबविण्याची अपेक्षा व्यक्त होत आहे.
राष्ट्रीय स्तरावर मिळालेला हा सन्मान केवळ नगरपरिषदेचा नसून, स्वच्छ आणि सुंदर रत्नागिरीसाठी योगदान देणाऱ्या प्रत्येक रत्नागिरीकराचा गौरव आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
