मासेमारी आटोपून किनाऱ्याकडे परतणाऱ्या मच्छीमार नौकेला महाकाय लाटेचा तडाखा बसल्याने ती समुद्रात उलटल्याची थरारक घटना रविवारी सकाळी राजीवडा समुद्रात घडली. ‘ओशियन पर्ल’ नावाची मच्छीमार नौका राजीवडा जेटीच्या दिशेने परतत असताना अचानक आलेल्या प्रचंड लाटेने नौकेला जोरदार तडाखा दिला. या तडाख्यामुळे नौकेचा तोल बिघडला आणि काही क्षणांतच नौका समुद्रात उलटली. नौकेवरील सर्व आठ मच्छीमार समुद्राच्या पाण्यात फेकले गेल्याने काही काळ परिसरात भीतीचे वातावरण निर्माण झाले होते.
मिळालेल्या माहितीनुसार, रविवारी सकाळी सुमारे पावणेनऊच्या सुमारास ‘ओशियन पर्ल’ ही नौका मासेमारी आटोपून राजीवडा जेटीकडे परतत होती. किनाऱ्यापासून काही अंतरावर असतानाच समुद्रात अचानक मोठी लाट आली. या लाटेने नौकेवर जोरदार धडक दिल्याने नौकेचा समतोल पूर्णपणे ढासळला. काही कळायच्या आत नौका उलटली आणि त्यावरील मच्छीमार थेट समुद्रात फेकले गेले.
या दुर्घटनेत साद हुसये (२१), मुहाफीस मुकादम (२२), अहमद सोलकर (३८), इम्तियाज मुजावर (२१), नासिर हुसये (६०), शोएब हुसये (३०), इमरान डंगी (३५) आणि तौसीफ सोलकर (३५) हे आठही मच्छीमार समुद्रात पडले. हे सर्वजण राजीवडा परिसरातील रहिवासी आहेत.
नौका उलटल्याने अचानक समुद्राच्या पाण्यात फेकले गेल्याने सर्वजण जीवाच्या आकांताने बचावासाठी प्रयत्न करत होते. समुद्राचा प्रवाह आणि लाटांचा वेग यामुळे परिस्थिती गंभीर बनली होती. अशा वेळी त्यांच्या मागून येत असलेल्या ‘अल सुरया’ या दुसऱ्या मच्छीमार नौकेवरील खलाशांच्या दुर्घटना लक्षात आली.
परिस्थितीचे गांभीर्य लक्षात येताच ‘अल सुरया’वरील खालिद होडेकर, अजमल हुनेरकर, कैफ होडेकर, खलील मजगावकर आणि यासीन पावसकर यांनी क्षणाचाही विलंब न करता बचावकार्य सुरू केले. समुद्रात बुडत असलेल्या मच्छीमारांपर्यंत पोहोचून त्यांनी एक-एक करून सर्व आठ जणांना बाहेर काढले.
खलाशांनी दाखवलेल्या या प्रसंगावधानामुळे समुद्रात घडू शकणारा मोठा अनर्थ टळला. आठही मच्छीमारांचा सुखरूप बचाव करण्यात आला असून त्यांना सुरक्षितपणे किनाऱ्यावर आणण्यात आले.
मासेमारी करणाऱ्या मच्छीमारांसाठी समुद्रातील अचानक बदलणाऱ्या परिस्थितीचे गांभीर्य या घटनेतून पुन्हा एकदा समोर आले आहे. मात्र, दुर्घटना घडताच मदतीला धावून गेलेल्या ‘अल सुरया’वरील खलाशांच्या धाडसामुळे आठ कुटुंबांवर ओढवू शकणारे मोठे संकट टळले. त्यांच्या धाडसाचे, तत्परतेचे आणि माणुसकीचे राजीवडा परिसरातून कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
