रत्नागिरी शहरालगतच्या नाचणे-सावंतनगर परिसरात भरदिवसा झालेल्या धाडसी घरफोडीमुळे नागरिकांमध्ये भीतीचे वातावरण निर्माण झाले आहे. अज्ञात चोरट्यांनी बंद घराचे कुलूप तोडून घरात प्रवेश करत सोन्या-चांदीच्या दागिन्यांसह तब्बल ४ लाख १६ हजार ७०० रुपयांचा मुद्देमाल लंपास केला. ही घटना मंगळवारी (९ जून) सकाळी १०.३० ते सायंकाळी ४ वाजण्याच्या दरम्यान घडली.
याप्रकरणी हेमंतकुमार महेंद्र चोप्रा (५३, रा. आसमंत, सावंतनगर-नाचणे) यांनी रत्नागिरी शहर पोलीस ठाण्यात तक्रार दाखल केली आहे. तक्रारीनंतर पोलिसांनी अज्ञात चोरट्यांविरोधात गुन्हा नोंद करून तपास सुरू केला आहे.
मिळालेल्या माहितीनुसार, चोप्रा हे कामानिमित्त घराबाहेर गेले होते. या संधीचा फायदा घेत चोरट्यांनी घराच्या मुख्य दरवाजाचे कुलूप कडीसह उचकटून आत प्रवेश केला. त्यानंतर घरातील लोखंडी व लाकडी कपाटे फोडून त्यामध्ये ठेवलेले मौल्यवान दागिने आणि वस्तू चोरी करून नेल्या.
चोरीस गेलेल्या ऐवजात ४० ग्रॅम वजनाचा सोन्याचा हार, ११.७८ ग्रॅमचे मंगळसूत्र, प्रत्येकी २० ग्रॅम वजनाच्या दोन सोन्याच्या बांगड्या, १० ग्रॅमची सोन्याची चेन, सोन्याच्या अंगठ्या, ब्रेसलेट, दोन सोन्याची नाणी, सोन्याचे पेंडंट, १० हजार रुपये किमतीची मोत्यांची माळ, २ हजार रुपये किमतीची कृत्रिम मोत्यांची माळ तसेच विविध चांदीच्या वस्तूंचा समावेश आहे. या सर्व ऐवजाची एकूण किंमत ४ लाख १६ हजार ७०० रुपये असल्याचे फिर्यादीने नमूद केले आहे.
घटनेची माहिती मिळताच रत्नागिरी शहर पोलिसांनी घटनास्थळी धाव घेत पंचनामा केला. तसेच परिसरातील सीसीटीव्ही कॅमेऱ्यांचे फुटेज ताब्यात घेऊन त्याची तपासणी सुरू केली आहे. चोरी करणाऱ्या संशयितांचा माग काढण्यासाठी पोलिसांकडून विविध पथके सक्रिय करण्यात आली आहेत.
दरम्यान, रत्नागिरी शहर आणि परिसरात अलीकडच्या काळात घरफोडीच्या घटनांमध्ये वाढ झाल्याचे चित्र दिसून येत आहे. विशेषतः भरदिवसा बंद घरे लक्ष्य केली जात असल्याने नागरिकांमध्ये असुरक्षिततेची भावना वाढली आहे. त्यामुळे पोलिसांनी गस्त वाढवून अशा गुन्हेगारांवर कठोर कारवाई करावी, अशी मागणी स्थानिक नागरिकांकडून होत आहे. या घरफोडीचा छडा लावून आरोपींना जेरबंद करण्याचे आव्हान आता पोलिसांसमोर उभे ठाकले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
