मंडणगड पोलीस ठाण्याच्या इमारतीतच दोन जणांनी एकमेकांना शिवीगाळ करत मारहाण केल्याची घटना गुरुवारी (दि. ५ नोव्हेंबर) सायंकाळी घडली. सायंकाळी ६.२० ते ६.३० वाजण्याच्या सुमारास घडलेल्या या प्रकारामुळे पोलीस ठाण्याच्या परिसरात गोंधळ निर्माण झाला. सार्वजनिक ठिकाणी एकमेकांना मारहाण करून शांतता भंग केल्याप्रकरणी दोघांविरोधात मंडणगड पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, राज अभिषेक विन्हेरकर (वय २२, रा. शिरवली, पो. पांगरी, ता. महाड, जि. रायगड) आणि अनिल अनंत घरटकर (रा. भिंगळोली, ता. मंडणगड, जि. रत्नागिरी) यांच्यात गुरुवारी सायंकाळी मंडणगड पोलीस ठाण्याच्या इमारतीत वाद झाला.
सायंकाळी ६.२० ते ६.३० या वेळेत दोघांनी पोलीस ठाण्याच्या इमारतीतच एकमेकांना शिवीगाळ करण्यास सुरुवात केली. हा वाद पुढे वाढत जाऊन दोघांनी एकमेकांना मारहाण केली. विशेष म्हणजे, पोलीस ठाण्याच्या इमारतीत आणि पोलिसांसमक्ष हा प्रकार घडल्याने सार्वजनिक शांततेचा भंग झाल्याचे पोलिसांच्या तक्रारीत नमूद करण्यात आले आहे.
या प्रकरणी मंडणगड पोलीस ठाण्याचे पोलीस हवालदार तेजस सूर्यकांत मोरे यांनी फिर्याद दिली. त्यांच्या फिर्यादीवरून राज विन्हेरकर आणि अनिल घरटकर या दोघांविरोधात गुन्हा रजिस्टर क्रमांक १३२/२०२६ नुसार भारतीय न्याय संहिता २०२३ च्या कलम १९४ (२) अन्वये गुन्हा दाखल करण्यात आला आहे. हे कलम भारतीय दंड विधानातील कलम १६० शी संबंधित आहे.
पोलीस ठाण्याच्या इमारतीतच घडलेल्या या प्रकाराची परिसरात चर्चा सुरू असून, या प्रकरणी मंडणगड पोलीस पुढील कार्यवाही करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
