लांजा तालुक्यात शनिवारी सायंकाळच्या सुमारास अचानक वातावरणात मोठा बदल होत वादळी वाऱ्यासह अवकाळी पावसाने जोरदार हजेरी लावली. या अचानक आलेल्या पावसामुळे नागरिकांची तारांबळ उडाली असून, काही ठिकाणी झाडांच्या फांद्या तुटून पडल्याच्या घटनाही घडल्या आहेत. वादळी वाऱ्याचा सर्वाधिक फटका लांजा शहरातील नाभिकवाडी परिसराला बसला.
नाभिकवाडी येथील मंदार मोरे यांच्या घरावरील पत्रे जोरदार वाऱ्यामुळे उडून गेल्याने घराचे मोठे नुकसान झाले. अचानक आलेल्या वादळी वाऱ्यामुळे काही क्षणांतच घराचे छप्पर उघडे पडले. पत्रे उडून गेल्याने घरातील फर्निचर, कपडे तसेच इतर साहित्य पावसाच्या पाण्यामुळे भिजल्याचे सांगण्यात येत आहे.
ही घटना घडल्यानंतर परिसरातील नागरिकांनी तत्काळ घटनास्थळी धाव घेत मोरे कुटुंबीयांना मदत केली. अचानक घडलेल्या या प्रकारामुळे कुटुंबीय घाबरून गेले होते. सुदैवाने या घटनेत कोणतीही जीवितहानी झाली नसली तरी आर्थिक नुकसान मोठ्या प्रमाणात झाले आहे.
दरम्यान, वादळी वाऱ्यामुळे लांजा शहरातील काही भागातील वीजपुरवठाही खंडित झाला. त्यामुळे नागरिकांना काही काळ अंधाराचा सामना करावा लागला. अचानक आलेल्या अवकाळी पावसामुळे शहरात काही काळ भीतीचे वातावरण निर्माण झाले होते.
हवामानातील अचानक बदल लक्षात घेता नागरिकांनी सतर्क राहावे, तसेच आवश्यक ती खबरदारी घ्यावी, असे आवाहन स्थानिकांकडून करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
