रत्नागिरी जिल्ह्यातील हर्णे किनारपट्टी परिसरात सुरू असलेल्या डिझेल तस्करीच्या मोठ्या रॅकेटचा सीमाशुल्क (कस्टम्स) विभागाने यशस्वीरीत्या पर्दाफाश केला आहे. या कारवाईत ‘रत्न माऊली’ नावाची तस्करी करणारी बोट आणि डिझेल खरेदी करणारी दुसरी बोट अशा दोन बोटी जप्त करण्यात आल्या असून, बोटीचा मालक आणि तांडेल अशा दोघांना अटक करून न्यायालयीन कोठडी सुनावण्यात आली आहे.
गोपनीय माहितीवरून कारवाई
हर्णे किनारपट्टीवर एक मासेमारी बोट इतर बोटींना अवैधरित्या डिझेल विकत असल्याची गोपनीय माहिती सीमाशुल्क विभागाला मिळाली होती. या माहितीची पडताळणी करत अधीक्षक (P&I) अतुल व्ही. पोतदार यांच्या नेतृत्वाखालील पथकाने २१ एप्रिल २०२६ च्या रात्री विशेष समुद्री शोधमोहीम हाती घेतली.
मध्यरात्री रंगेहात पकड
हर्णे किनाऱ्यापासून सुमारे ११ नॉटिकल मैल अंतरावर ‘रत्न माऊली’ ही संशयित बोट पथकाला आढळली. २१ आणि २२ एप्रिलच्या मध्यरात्री ही बोट इतर बोटीला डिझेल विक्री करत असतानाच अधिकाऱ्यांनी धाड टाकत दोन्ही बोटी रंगेहात पकडल्या. या कारवाईत कोणताही प्रतिकार होऊ नये यासाठी पथकाने काळजीपूर्वक नियोजन केले होते.
मोठ्या प्रमाणात डिझेल जप्त
कारवाईनंतर दोन्ही बोटी तात्काळ दाभोळ जेटी येथे आणण्यात आल्या. बोटींच्या कप्प्यांमध्ये साठवलेले मोठ्या प्रमाणातील अवैध डिझेल जप्त करण्यात आले आहे. प्राथमिक तपासानुसार, गेल्या दोन महिन्यांत ‘रत्न माऊली’ या बोटीमार्फत सुमारे ३०० टनांहून अधिक डिझेलची तस्करी करून विक्री करण्यात आल्याचे उघड झाले आहे. यामुळे किनारपट्टीवर मोठ्या प्रमाणावर अवैध इंधन व्यवहार सुरू असल्याचे स्पष्ट झाले आहे.
रॅकेटचे धागेदोरे शोधण्याचे काम सुरू
या प्रकरणामागे केवळ एक-दोन व्यक्ती नसून मोठे जाळे कार्यरत असल्याची शक्यता सीमाशुल्क विभागाने व्यक्त केली आहे. तस्करीचे हे डिझेल नेमके कुठून आणले जात होते, कोणत्या बोटींना पुरवठा होत होता आणि आर्थिक व्यवहार कसे होत होते, याचा सखोल तपास सध्या सुरू आहे. या रॅकेटमध्ये आणखी काही जणांचा सहभाग असल्याची शक्यता नाकारता येत नसल्याने तपास युद्धपातळीवर सुरू आहे.
न्यायालयीन कोठडी
या प्रकरणातील आरोपींना अटक करण्यासाठी विशेष सरकारी वकील शेखर डी. टोणपे यांनी न्यायालयात अर्ज सादर केला होता. दापोली येथील माननीय न्यायदंडाधिकाऱ्यांनी २४ एप्रिल २०२६ रोजी हा अर्ज मंजूर करत दोन्ही आरोपींना न्यायालयीन कोठडी सुनावली.
नागरिकांना आवाहन
दरम्यान, सीमाशुल्क विभागाचे सहाय्यक आयुक्त संदीप कृष्णा यांनी नागरिकांना आवाहन केले आहे की, किनारपट्टीवर किंवा समुद्रात संशयास्पद हालचाली आढळल्यास तात्काळ प्रशासनाला माहिती द्यावी. नागरिक ८७९६८९५९९० किंवा ८४२११८४७५० या क्रमांकावर फोन किंवा व्हॉट्सॲपद्वारे माहिती देऊ शकतात, असे जनसंपर्क अधिकारी लक्ष्मीकांत भाटकर यांनी कळवले आहे.
या कारवाईमुळे हर्णे किनारपट्टीवरील तस्करीविरोधात मोठा आळा बसण्याची शक्यता व्यक्त केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
