लांजा शहरातील देवराई परिसरात वन्य प्राण्यांच्या शिकारीसाठी बंदूक घेऊन टपून बसलेल्या दोन संशयितांना लांजा पोलिसांनी बुधवारी दुपारी अत्यंत शिताफीने अटक केली. या कारवाईमुळे संभाव्य वन्यजीव शिकार टळली असून शहरात मोठी खळबळ उडाली आहे.
मिळालेल्या माहितीनुसार, देवराई येथील गोपाळकृष्ण मंदिराजवळ नदीपलीकडील झुडपांमध्ये दोन व्यक्ती शिकारीच्या उद्देशाने लपून बसल्याची खात्रीशीर माहिती पोलिसांना मिळाली होती. या माहितीच्या आधारे पोलीस उपनिरीक्षक अमोद सरंगले, सहाय्यक पोलीस उपनिरीक्षक भालचंद्र रेवणे, कॉन्स्टेबल सुयोग वाडकर, नितेश राणे तसेच चालक नाना डोलरेकर यांच्या पथकाने दुपारी सुमारे १ वाजता घटनास्थळी धाव घेत सापळा रचला.
पोलिसांची चाहूल लागताच संशयितांनी पळून जाण्याचा प्रयत्न केला. मात्र पोलिसांनी वेगाने हालचाल करत परिसराला घेराव घालत दोघांनाही ताब्यात घेतले. अटक करण्यात आलेल्यांमध्ये अरुण नारायण चौगुले (वय ४६, रा. भडे पिंपळवाडी) आणि शैलेश दिलीप मेस्त्री (वय ३३, रा. इसवली सुतारवाडी) यांचा समावेश आहे.
कारवाईदरम्यान पोलिसांनी आरोपींकडून १२ बोअरची बंदूक आणि तीन जिवंत काडतुसे जप्त केली आहेत. या प्रकरणी दोघांविरुद्ध संबंधित कायद्यांनुसार गुन्हा दाखल करण्यात आला आहे.
भरवस्तीत आणि दिवसाढवळ्या घडलेल्या या प्रकारामुळे नागरिकांमध्ये भीतीचे वातावरण निर्माण झाले आहे. तसेच या शिकाऱ्यांना बाहेरून कोणी मदत केली होती का, किंवा त्यांच्यासोबत आणखी काही साथीदार होते का, याबाबत पोलिसांकडून सखोल तपास सुरू आहे.
पोलिसांच्या तत्पर आणि धाडसी कारवाईमुळे वन्य प्राण्यांची संभाव्य शिकार टळली असून, अशा बेकायदेशीर कृत्यांवर आळा बसण्यास मदत होणार असल्याची भावना स्थानिकांकडून व्यक्त केली जात आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
