दापोली | प्रतिनिधी : सागर गोवळे
पुस्तकी ज्ञानाच्या चौकटीबाहेर जाऊन प्रत्यक्ष शेतीचा अनुभव घेण्यासाठी राबविण्यात येणाऱ्या RAWE (Rural Agricultural Work Experience) कार्यक्रमांतर्गत दापोली तालुक्यात एक हृदयस्पर्शी आणि प्रेरणादायी उपक्रम पार पडला. ग्रामीण भागातील कृषी सखी गटाच्या विद्यार्थिनींनी आपल्या यजमान शेतकरी कुटुंबांसमवेत गुरु पौर्णिमा मोठ्या उत्साहात साजरी करत शेतकऱ्यांप्रती कृतज्ञता व्यक्त केली.
या कार्यक्रमात विद्यार्थिनींनी पारंपरिक गुरु-शिष्य परंपरेला एक वेगळा अर्थ दिला. पुस्तकी ज्ञानापेक्षा प्रत्यक्ष मातीशी नाळ जोडणारे, शेतीतील बारकावे शिकवणारे आणि प्रत्येक अडचणीच्या वेळी मार्गदर्शकाची भूमिका निभावणाऱ्या शेतकऱ्यांनाच त्यांनी आपले खरे ‘गुरु’ मानले.
यावेळी विद्यार्थिनींनी स्वतःच्या हाताने तयार केलेली हस्तनिर्मित कागदी फुले भेट देत यजमान शेतकऱ्यांचा सन्मान केला. या साध्या पण मनापासून केलेल्या सन्मानामुळे शेतकरी कुटुंबही भावूक झाले. गुरु पौर्णिमेचा हा अनोखा सोहळा ग्रामीण भागातील शिक्षण, संस्कार आणि शेतीशी असलेले नाते अधिक दृढ करणारा ठरला.
RAWE कार्यक्रमामुळे देशाच्या विविध भागांतून आलेल्या कृषी विद्यार्थिनींना ग्रामीण जीवन, शेतीतील प्रत्यक्ष कामकाज, आधुनिक व पारंपरिक शेती पद्धती तसेच शेतकरी कुटुंबांच्या जीवनशैलीचा जवळून परिचय होत आहे. या अनुभवातून विद्यार्थिनींमध्ये केवळ कृषीविषयक ज्ञानच नव्हे, तर शेतकऱ्यांविषयी आदर, संवेदनशीलता आणि सामाजिक बांधिलकीची जाणीवही अधिक दृढ होत आहे.
गुरु पौर्णिमेनिमित्त आयोजित करण्यात आलेल्या या उपक्रमाने “शेतकरी हाच खरा गुरु” हा संदेश प्रभावीपणे अधोरेखित केला. उपस्थितांनी या अभिनव उपक्रमाचे कौतुक करत कृषी शिक्षणाला मानवी मूल्यांची जोड देणारा हा उपक्रम असल्याचे मत व्यक्त केले.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
