पिंपरी-चिंचवड येथून दापोलीकडे येणारी राज्य परिवहन महामंडळाची निमआराम ‘शिवशाही’ बस आज शुक्रवारी (१२ जून) पहाटेच्या सुमारास दापोली एसटी स्थानकापासून अवघ्या काही अंतरावर असताना अचानक बंद पडल्याची घटना घडली. या बिघाडामुळे गाढ झोपेत असलेल्या प्रवाशांना मध्यरात्रीच बसमधून उतरावे लागले. परिणामी अनेक प्रवाशांना आपले सामान घेऊन पायपीट करत गंतव्यस्थानी जावे लागल्याने संतापाची लाट उसळली आहे.
मिळालेल्या माहितीनुसार, पिंपरी-चिंचवड आगारातून नियोजित वेळेनुसार सुटलेली शिवशाही बस दापोलीच्या दिशेने येत होती. आरामदायी आणि सुरक्षित प्रवासाच्या अपेक्षेने अनेक प्रवाशांनी जादा भाडे भरून शिवशाही सेवेची निवड केली होती. मात्र, दापोली गाठण्यापूर्वीच बसमध्ये तांत्रिक बिघाड निर्माण झाल्याने प्रवाशांचा प्रवास त्रासदायक ठरला.
पहाटेच्या सुमारास बस अचानक बंद पडल्याने चालक आणि वाहकांनी बस सुरू करण्यासाठी प्रयत्न केले. मात्र, बिघाड दूर न झाल्याने बस पुढे जाऊ शकली नाही. त्यामुळे बसमधील प्रवाशांना रात्रीच्या वेळीच रस्त्यावर उतरावे लागले. काही प्रवाशांसोबत महिला, ज्येष्ठ नागरिक आणि लहान मुलेही असल्याने त्यांना मोठ्या गैरसोयीचा सामना करावा लागला.
विशेष म्हणजे, दापोली एसटी स्थानक अगदी जवळ असतानाच बस बंद पडल्याने प्रवाशांचा संताप अधिकच वाढला. “जादा भाडे भरूनही अशी सेवा मिळत असेल तर शिवशाहीचा उपयोग काय?” असा सवाल अनेक प्रवाशांनी उपस्थित केला. काहींनी राज्य परिवहन महामंडळाच्या वाहनांच्या देखभालीबाबत नाराजी व्यक्त करत अशा घटना वारंवार घडत असल्याचा आरोप केला.
शिवशाहीसारख्या प्रीमियम सेवांच्या वाहनांची नियमित तपासणी करून अशा घटना टाळाव्यात, अशी मागणी प्रवाशांकडून करण्यात येत आहे. दरम्यान, या प्रकारामुळे राज्य परिवहन महामंडळाच्या सेवांच्या दर्जाबाबत पुन्हा एकदा प्रश्नचिन्ह निर्माण झाले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
