दापोली तालुक्यातील हर्णे बाजारपेठ येथे कौटुंबिक वादातून ७५ वर्षीय वृद्ध महिला व तिच्या अल्पवयीन नातीवर लाकडी दांडक्याने हल्ला झाल्याची गंभीर घटना शुक्रवारी (दि. ५ जून) दुपारी घडली. या प्रकरणी दापोली पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, जयश्री रमेश भंडारे (वय ७५, रा. हर्णे बाजारपेठ) यांनी दिलेल्या फिर्यादीवरून शिवसागर सुरेश भंडारे (वय ३५, रा. हर्णे बाजारपेठ) याच्याविरोधात भारतीय न्याय संहिता २०२३ च्या कलम ११८(२), ३३२(ग), ३५१(२) व ३५२ अन्वये गुन्हा दाखल करण्यात आला आहे.
घटनेच्या वेळी जयश्री भंडारे या आपल्या घरातील हॉलमध्ये बसल्या होत्या. त्यावेळी आरोपी शिवसागर भंडारे हा शिवीगाळ करत हातात लाकडी दांडका घेऊन घरात घुसला. त्याने “तुला आत्ता जिवंत सोडणार नाही,” अशी धमकी देत त्यांच्या डोक्यावर दांडक्याने जोरदार प्रहार केला. त्यानंतर डाव्या व उजव्या हातावर तसेच कंबरेवर वारंवार मारहाण करून गंभीर दुखापत केली.
या हल्ल्यात जयश्री भंडारे यांच्या डोक्याला व हाताला गंभीर जखमा होऊन रक्तस्त्राव सुरू झाला. त्यांना वाचवण्यासाठी पुढे आलेली त्यांची नात महेक किशोर भंडारे (वय १६) हिलाही आरोपीने दांडक्याने मारहाण करून शिवीगाळ केली. हल्ल्यानंतर आरोपीने फिर्यादी व त्यांच्या कुटुंबीयांना जीवे मारण्याची धमकी दिल्याचे फिर्यादीत नमूद करण्यात आले आहे.
या घटनेत जखमी झालेल्या जयश्री भंडारे यांच्यावर उपचार सुरू असून दापोली पोलिस अधिक तपास करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
