खेड तालुक्यातील लोटेमाळ माळवाडी येथे किराणा दुकानात झालेल्या किरकोळ वादातून एका तरुणीला मारहाण झाल्याची धक्कादायक घटना रविवारी (३ मे) दुपारी घडली. या घटनेमुळे परिसरात काही काळ तणावाचे वातावरण निर्माण झाले होते. या प्रकरणी खेड पोलिस ठाण्यात गुन्हा दाखल करण्यात आला असून पुढील तपास सुरू आहे.
मिळालेल्या माहितीनुसार, लोटेमाळ येथील रहिवासी नितेश संजय भालेकर (वय २४) यांनी याबाबत खेड पोलिस ठाण्यात फिर्याद दाखल केली आहे. फिर्यादीत नमूद केल्याप्रमाणे, त्यांची चुलत बहीण गौरी भालेकर आणि तिची मैत्रीण स्वरा काते या दोघी ‘मातोश्री किराणा स्टोअर्स’ या दुकानात चिकन मसाला खरेदी करण्यासाठी गेल्या होत्या. हे दुकान आरोपी रसीका शंकर नलावडे यांच्या मालकीचे आहे.
दुकानात खरेदी करत असताना गौरी भालेकर हिने एकेरी भाषेत संवाद साधल्याने दोघींमध्ये किरकोळ वाद निर्माण झाला. हा वाद हळूहळू चिघळत गेला आणि संतापाच्या भरात दुकानात असलेल्या काठीच्या साहाय्याने गौरी भालेकर हिला मारहाण केल्याचा आरोप फिर्यादीत करण्यात आला आहे. या मारहाणीमध्ये गौरी हिला दुखापत झाली.
दरम्यान, ही घटना समजताच फिर्यादी नितेश भालेकर यांनी घटनास्थळी धाव घेत आरोपीला जाब विचारला. यावेळी त्यांच्याशीही शिवीगाळ करून आक्रमक वर्तन केल्याचे फिर्यादीत नमूद करण्यात आले आहे.
मारहाणीत जखमी झालेल्या गौरी भालेकर हिला तात्काळ उपचारासाठी रुग्णालयात दाखल करण्यात आले असून तिची प्रकृती स्थिर असल्याची माहिती वैद्यकीय सूत्रांनी दिली आहे.
या प्रकरणी खेड पोलिस ठाण्यात भारतीय न्यायसंहिता अधिनियम २०२३ अंतर्गत कलम ११८(१) व १११(२) नुसार गुन्हा क्रमांक १२७/२०२६ दाखल करण्यात आला आहे. पोलिसांनी या घटनेचा अधिक तपास सुरू केला असून संबंधितांकडून अधिक माहिती घेतली जात आहे.
या घटनेमुळे लोटेमाळ माळवाडी परिसरात काही काळ तणावाचे वातावरण निर्माण झाले होते. नागरिकांनी अशा प्रकारच्या घटना टाळण्यासाठी संयम बाळगण्याची गरज व्यक्त केली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
