चिपळूण शहरातील सती नाका परिसरात असलेल्या एका रेफ्रिजरेशन दुकानात अज्ञात चोरट्यांनी खिडकी तोडून घरफोडी केल्याची घटना उघडकीस आली असून व्यापारी वर्गात भीतीचे वातावरण पसरले आहे. या चोरीत सुमारे १ लाख ४ हजार ५०० रुपयांचा ऐवज लंपास करण्यात आला आहे.
पोलिसांनी दिलेल्या माहितीनुसार, फिर्यादी प्रदीप काशिनाथ कदम (वय ४५, रा. वेहळे कदमवाडी) यांचे सती नाका येथे “श्री सुकाई रेफ्रिजिरेशन” नावाचे दुकान आहे. दिनांक ३ मे रोजी सकाळी ८ वाजल्यापासून ४ मे रोजी सकाळी ९ वाजेपर्यंतच्या कालावधीत अज्ञात चोरट्यांनी दुकानाच्या खिडकीचे गज तोडून आत प्रवेश केला.
यानंतर चोरट्यांनी दुकानातील विविध मौल्यवान साहित्य लंपास केले. यात सुमारे १७ हजार रुपये किमतीचा कॉम्प्रेसर, २५ हजार रुपयांचे एसी व फ्रिज सर्व्हिसिंग टूलकिट, डीप फ्रीजची कुलिंग कॉईल, ब्लोवर, सर्व्हिस पंप, वॉशिंग पाईप, ड्रिल मशीन तसेच सुमारे ३० हजार रुपये किमतीचे तांब्याच्या पाईपचे तुकडे असा एकूण १.०४ लाख रुपयांचा माल चोरीला गेला आहे.
घटनेची माहिती मिळताच फिर्यादी यांनी चिपळूण पोलीस ठाण्यात तक्रार दाखल केली. त्यानुसार पोलिसांनी भारतीय न्याय संहिता २०२३ अंतर्गत कलम ३३१(२), ३३१(४) आणि ३०५ प्रमाणे गुन्हा रजिस्टर क्रमांक १३०/२०२६ दाखल केला आहे.
या प्रकरणाच्या तपासासाठी पोलिसांनी आधुनिक तंत्रज्ञानाचा वापर करत ‘ई-साक्ष’ ॲपच्या माध्यमातून पुरावे संकलित करण्यास सुरुवात केली असून अज्ञात आरोपींचा शोध सुरू आहे. या घटनेमुळे परिसरातील व्यापाऱ्यांमध्ये असुरक्षिततेची भावना निर्माण झाली असून पोलिसांनी रात्री गस्त वाढवण्याची मागणी होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
