मोबाईल नंबर ब्लॉक केल्याचा आणि संवाद साधण्यास नकार दिल्याचा राग मनात धरून एका ४० वर्षीय व्यक्तीने ३० वर्षीय तरुणीला भर रस्त्यात अडवून मारहाण केल्याची धक्कादायक घटना चिपळूण शहरात घडली आहे. आरोपीने तरुणीला अश्लील शिवीगाळ करत लाथाबुक्क्यांनी मारहाण केली तसेच दगडाने डोक्यात वार केल्याने ती गंभीर जखमी झाली. या प्रकरणी चिपळूण पोलीस ठाण्यात गुन्हा दाखल करण्यात आला असून घटनेमुळे परिसरात खळबळ उडाली आहे.
पोलिसांकडून मिळालेल्या माहितीनुसार, चिपळूण बाजारपेठ परिसरात राहणारी ३० वर्षीय तरुणी नोकरीनिमित्त बाहेर गेली होती. गुरुवार, ११ जून २०२६ रोजी रात्री सुमारे ८ वाजण्याच्या सुमारास ती आपल्या दुचाकीवरून गोवळकोट रोडवरील कमानी तिठा परिसरातील इम्रान चायनीज सेंटरच्या मागील रस्त्याने घरी जात होती. त्यावेळी गोवळकोट येथील रहिवासी राहिल पटेल (वय ४०) याने तिचा रस्ता अडवून गाडी थांबवण्यास भाग पाडले.
त्यानंतर आरोपीने तरुणीकडे “मला तुझ्याशी बोलायचे आहे, माझा मोबाईल नंबर अनब्लॉक कर,” अशी मागणी केली. मात्र, संबंधित तरुणीने त्याच्याशी कोणताही संबंध ठेवायचा नसल्याचे स्पष्ट शब्दांत सांगितले. तसेच भविष्यातही त्याच्याशी बोलण्याची इच्छा नसल्याचे सांगून ती तेथून निघण्याचा प्रयत्न करू लागली.
तरुणीच्या या नकारामुळे संतप्त झालेल्या आरोपीने भर रस्त्यातच अश्लील भाषेत शिवीगाळ सुरू केली. त्यानंतर त्याने तिला जोरदार धक्काबुक्की करत हाताच्या ठोशांनी तिच्या उजव्या डोळ्यावर, चेहऱ्यावर आणि डाव्या कानामागे मारहाण केली. अचानक झालेल्या या हल्ल्यामुळे तरुणीला स्वतःचा बचाव करण्याचीही संधी मिळाली नाही.
मारहाणीची तीव्रता इतकी होती की आरोपीने रस्त्यावरील दगड उचलून तिच्या डोक्याच्या मागील डाव्या बाजूस जोरात मारला. या प्रहारामुळे तिच्या डोक्याला गंभीर दुखापत झाली आणि ती रक्तबंबाळ झाली. घटनेनंतर आरोपी तेथून पसार झाल्याचे सांगण्यात आले.
जखमी अवस्थेत तरुणीने चिपळूण पोलीस ठाण्यात जाऊन घडलेला प्रकार पोलिसांना सांगितला आणि अधिकृत तक्रार दाखल केली. तक्रारीनुसार पोलिसांनी आरोपी राहिल पटेल याच्याविरुद्ध मारहाण, शिवीगाळ, धमकी आणि दुखापत केल्याप्रकरणी विविध कलमांन्वये गुन्हा दाखल केला आहे.
या घटनेमुळे चिपळूण शहरात महिलांच्या सुरक्षिततेबाबत चिंता व्यक्त केली जात आहे. एखाद्या महिलेने संवाद ठेवण्यास नकार दिला किंवा मोबाईल नंबर ब्लॉक केला म्हणून तिच्यावर अशा प्रकारे हल्ला होणे ही गंभीर बाब असल्याची प्रतिक्रिया नागरिकांकडून व्यक्त होत आहे. दरम्यान, या प्रकरणाचा पुढील तपास चिपळूण पोलीस करत असून आरोपीच्या हालचालींवर लक्ष ठेवण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
