महाराष्ट्र दिन आणि कामगार दिनाचे औचित्य साधत दि. चिपळूण अर्बन को-ऑपरेटिव्ह प्रा. लि. बँक, चिपळूण यांच्या माध्यमातून सामाजिक कार्याचा एक भाग म्हणून भव्य मोफत महाआरोग्य शिबिराचे आयोजन करण्यात आले. लाईफ केअर हॉस्पिटल, उपजिल्हा रुग्णालय कामथे तसेच NAB आय हॉस्पिटल, चिपळूण यांच्या संयुक्त सहकार्याने हे शिबिर मोठ्या उत्साहात पार पडले.
आरोग्यसेवा सर्वसामान्यांपर्यंत पोहोचावी आणि ग्रामीण तसेच शहरी भागातील नागरिकांना तज्ञ डॉक्टरांची सेवा मोफत मिळावी या उद्देशाने आयोजित या शिबिराला नागरिकांचा उत्स्फूर्त प्रतिसाद मिळाला. एकाच ठिकाणी विविध आजारांवर तपासणी व उपचार सुविधा उपलब्ध करून देण्यात आल्यामुळे नागरिकांनी मोठ्या प्रमाणात सहभाग नोंदवला.
या शिबिरात तज्ञ डॉक्टरांकडून ईसीजी, रक्तदाब, मधुमेह तपासणी, कर्करोग तपासणी, अस्थमा (दम्याचे आजार), महिलांची विशेष तपासणी, काना-घसा तपासणी तसेच डोळ्यांची तपासणी करण्यात आली. याशिवाय आवश्यकतेनुसार इंजेक्शन, सलाईन व औषधोपचार मोफत देण्यात आले. गंभीर स्वरूपाच्या काही रुग्णांची पुढील तपासणी व शस्त्रक्रियेसाठी निवड करण्यात आली.
या शिबिराच्या यशस्वी आयोजनासाठी रुग्णसेवक व समाजसेवक शशिकांत मारुती चव्हाण यांनी विशेष परिश्रम घेतले. अत्यंत कमी वेळेत नियोजन करून त्यांनी हे शिबिर यशस्वीपणे पार पाडले. गेल्या १५ वर्षांपासून सुरू असलेल्या त्यांच्या रुग्णसेवेतील हे १३००वे शिबिर ठरले, ही बाब उपस्थितांसाठी प्रेरणादायी ठरली.
या उल्लेखनीय कार्याबद्दल बँकेचे चेअरमन सन्माननीय मोहन यांनी शशिकांत चव्हाण यांचा सत्कार करून त्यांचे आभार मानले. त्यांच्या सामाजिक आणि वैद्यकीय क्षेत्रातील योगदानाची प्रशंसा करत पुढील काळातही असेच उपक्रम राबवावेत, अशा शुभेच्छा त्यांनी व्यक्त केल्या.
या प्रसंगी चिपळूण अर्बन बँकेचे अध्यक्ष मोहनशेठ मिरगल, उपाध्यक्ष धनंजय खातू, माजी अध्यक्ष सतीश अप्पा खेडेकर, संचालक ऍड. दिलीप उर्फ भाऊ दळी,. समीर जाणनवलकर,. सुनिल खेडेकर,
. रत्नदीप देवळेकर,. विराज दळी, चिफ ऑफिसर . अरविंद भागडे,. नितीन चिंगळे, प्रशासन अधिकारी. समीर जंगम तसेच बँकेचा अधिकारी, कर्मचारी व नागरिक बहुसंख्येने उपस्थित होते.
या शिबिरामध्ये एकूण ११७ नागरिकांनी लाभ घेतला. शिबिराला बँकेचे संचालक मंडळ, अधिकारी, कर्मचारी तसेच विविध क्षेत्रातील तज्ञ डॉक्टर मोठ्या संख्येने उपस्थित होते. समाजोपयोगी उपक्रमामुळे परिसरात समाधानाचे वातावरण निर्माण झाले असून या उपक्रमाचे सर्वत्र कौतुक होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
