चिपळूण तालुक्यातील आबलोली ते वहाळफाटा मार्गावर निवळी स्टॉपजवळ बुधवारी रात्री घडलेल्या भीषण अपघाताने परिसरात खळबळ उडाली आहे. दारूच्या नशेत भरधाव वेगाने वॅगनआर कार चालवणाऱ्या चालकाने समोरून येणाऱ्या दुचाकीला जोरदार धडक दिल्याने दुचाकीस्वार व्यापारी गंभीर जखमी झाला आहे. अपघात इतका भीषण होता की दोन्ही वाहनांचे मोठ्या प्रमाणात नुकसान झाले असून जखमी व्यापाऱ्याच्या डोक्याला गंभीर दुखापत झाली आहे.
मिळालेल्या माहितीनुसार, सुयोग सुरेंद्र सुर्वे (वय ३९, रा. निवळी कोंडवाडी) हे बुधवारी रात्री आपल्या मालकीची मोटरसायकल (क्र. एमएच ०८ एव्हाय ०१८२) घेऊन आबलोली-वहाळफाटा मार्गाने घराकडे परतत होते. रात्री सुमारे ९.५० वाजण्याच्या सुमारास ते निवळी स्टॉपजवळ पोहोचले असता समोरून भरधाव वेगात येणाऱ्या वॅगनआर कारने (क्र. एमएच ०२ ईपी ०४७८) त्यांच्या दुचाकीला समोरासमोर जोरदार धडक दिली.
प्रत्यक्षदर्शींनी दिलेल्या माहितीनुसार, अपघातावेळी कारचा वेग प्रचंड होता. चालक सूर्यकांत दत्ताराम लाड (वय ५६, रा. ढाकमोली) हा दारूच्या नशेत वाहन चालवत असल्याने त्याचे वाहनावरील नियंत्रण सुटले. त्याने गाडी थेट विरुद्ध दिशेच्या लेनमध्ये नेल्याने समोरून येणाऱ्या दुचाकीला थेट धडक बसली.
या भीषण धडकेमुळे दुचाकीस्वार सुयोग सुर्वे हे काही अंतरावर रस्त्यावर फेकले गेले. त्यांच्या डोक्याला गंभीर मार लागला असून शरीराच्या इतर भागांनाही दुखापती झाल्या आहेत. अपघातानंतर परिसरातील नागरिक आणि वाहनचालकांनी तातडीने घटनास्थळी धाव घेत मदतकार्य सुरू केले. जखमी सुर्वे यांना तात्काळ उपचारासाठी रुग्णालयात दाखल करण्यात आले. त्यांची प्रकृती गंभीर असल्याची माहिती मिळत आहे.
अपघातानंतर वॅगनआर कार आणि दुचाकीचे मोठ्या प्रमाणात नुकसान झाले. धडकेचा आवाज मोठा असल्याने परिसरातील नागरिक घटनास्थळी जमा झाले होते. काही काळ या मार्गावरील वाहतुकीत अडथळाही निर्माण झाला होता.
घटनेची माहिती मिळताच चिपळूण पोलिसांनी घटनास्थळी धाव घेत पंचनामा केला. तपासादरम्यान कार चालक सूर्यकांत लाड हा मद्यधुंद अवस्थेत वाहन चालवत असल्याचे निष्पन्न झाले. याप्रकरणी पोलिसांनी त्याच्याविरोधात भारतीय न्यायसंहिता २०२३ अंतर्गत कलम २८१, १२५ (अ), १२५ (ब) तसेच मोटार वाहन अधिनियम १९८८ चे कलम १८४ आणि १८५ अन्वये गुन्हा दाखल केला आहे. हा गुन्हा रजिस्टर क्रमांक ५१/२०२६ नुसार नोंदवण्यात आला असून पुढील तपास चिपळूण पोलीस करत आहेत.
दरम्यान, वाढत्या मद्यधुंद वाहनचालकांमुळे अपघातांच्या घटनांमध्ये वाढ होत असल्याने नागरिकांमधून चिंता व्यक्त केली जात आहे. अशा बेदरकार वाहनचालकांवर कठोर कारवाई करण्याची मागणी स्थानिकांकडून करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
