देवरुख येथील सामाईक जागेवरून सुरू असलेल्या जुन्या वादाचे पर्यवसान सख्ख्या भावावर हल्ल्याच्या प्रयत्नात झाल्याची घटना संगमेश्वर तालुक्यातील देवरुख येथील अमृतनगर परिसरात घडली. ७१ वर्षीय विजय धोंडू चाळके यांच्यावर त्यांचेच सख्खे भाऊ मिलिंद धोंडू चाळके यांनी शिवीगाळ करत ओलसर व कुजलेल्या दांडक्याने हल्ला करण्याचा प्रयत्न केल्याचा आरोप आहे. या घटनेत दांडका विजय यांच्या डोक्याला न लागता उजव्या पायाच्या पोटरीवर लागल्याने ते जखमी झाले. याप्रकरणी विजय चाळके यांच्या तक्रारीवरून देवरुख पोलिस ठाण्यात मिलिंद चाळके यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, २४ ऑगस्ट रोजी सकाळी ९.१५ वाजल्यापासून २५ ऑगस्ट रोजी सकाळी १० वाजेपर्यंतच्या कालावधीत आनंदी कुंज, अमृतनगर, देवरुख येथे हा प्रकार घडला. विजय चाळके हे त्यांच्या राहत्या घरी आले असता त्यांचे भाऊ मिलिंद चाळके तेथे आले. दोघांमध्ये सामाईक जागेवरून पूर्वीपासून वाद असल्याचे तक्रारीत नमूद करण्यात आले आहे.
वादाचे रूपांतर हाणामारीच्या प्रयत्नात
सामाईक जागेच्या मुद्द्यावरून दोघांमध्ये वाद सुरू झाला. यावेळी मिलिंद चाळके यांनी विजय यांच्याशी वाद घालत शिवीगाळ केल्याचा आरोप आहे. तसेच विजय यांच्याविषयी आक्षेपार्ह वक्तव्य केल्याने त्यांची पत्नी घराबाहेर आली.
विजय यांच्या पत्नीने मोबाईलवर घटनेचे शूटिंग करण्यास सुरुवात केल्याचे सांगत मिलिंद यांनी जमिनीवर पडलेला ओलसर व कुजलेला दांडका हातात घेतला. त्यानंतर त्यांनी विजय यांच्या डोक्यावर दांडक्याने प्रहार करण्याचा प्रयत्न केला. मात्र, विजय यांच्या पत्नीने वेळीच हस्तक्षेप करून त्यांना बाजूला केल्याने मोठा अनर्थ टळला.
डोक्याऐवजी पायावर दांडका लागला
पत्नीने वेळीच बाजूला केल्यामुळे दांडका विजय यांच्या डोक्याला लागला नाही. मात्र, तो त्यांच्या उजव्या पायाच्या पोटरीवर जोरात लागल्याने विजय चाळके जखमी झाले. हल्ल्याच्या प्रयत्नानंतरही आरोपीने शिवीगाळ व दमदाटी सुरूच ठेवल्याचे तक्रारीत म्हटले आहे.
‘हात-पाय तोडून टाकू’ अशी धमकी
आरोपीने विजय चाळके आणि त्यांच्या पत्नीच्या दिशेने दांडका उगारत हात-पाय तोडून टाकण्याची तसेच येथेच गाडून टाकण्याची धमकी दिल्याचा आरोप करण्यात आला आहे. याशिवाय पोलिसांना मॅनेज केल्याचे सांगत वकिलाच्या संदर्भातही दमदाटी केल्याचे पोलिसांनी नमूद केले आहे.
२५ ऑगस्ट रोजी सकाळी पुन्हा शिवीगाळ आणि धमकी दिल्यानंतर विजय चाळके यांनी देवरुख पोलिस ठाण्यात धाव घेत तक्रार दाखल केली.
विविध कलमांनुसार गुन्हा दाखल
विजय चाळके यांच्या तक्रारीवरून देवरुख पोलिस ठाण्यात गुन्हा क्रमांक १२७/२०२६ नुसार भारतीय न्याय संहिता २०२३ मधील कलम ११८(१), ३५२ आणि ३५१(२) अन्वये गुन्हा दाखल करण्यात आला आहे.
सामाईक जागेच्या वादातून सख्ख्या भावांमध्ये झालेल्या या प्रकारामुळे अमृतनगर परिसरात चर्चेला उधाण आले आहे. प्रकरणाचा पुढील तपास देवरुख पोलिसांकडून करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
