रत्नागिरीच्या शैक्षणिक आणि कौशल्य विकास क्षेत्रासाठी अभिमानास्पद कामगिरी समोर आली आहे. रत्नागिरीतील दोन शासकीय औद्योगिक प्रशिक्षण संस्थांमधील (ITI) प्रशिक्षणार्थी अथर्व नागवेकर आणि श्रावणी चव्हाण यांनी आपापल्या व्यवसाय अभ्यासक्रमांमध्ये राज्यासह देशातही प्रथम क्रमांक पटकावला आहे. त्यांच्या या यशामुळे रत्नागिरीच्या शिरपेचात मानाचा तुरा रोवला गेला असून, सर्व स्तरांतून त्यांच्यावर अभिनंदनाचा वर्षाव होत आहे.
रत्नागिरी येथील लोकमान्य बाळ गंगाधर टिळक शासकीय औद्योगिक प्रशिक्षण संस्थेतील प्रशिक्षणार्थी अथर्व नागवेकर याने ‘कॉम्प्युटर ऑपरेटर अँड प्रोग्रामिंग असिस्टंट’ (COPA) या व्यवसाय अभ्यासक्रमात देशात आणि राज्यात प्रथम क्रमांक मिळवला आहे. संगणक क्षेत्रातील या अभ्यासक्रमात अव्वल स्थान मिळवत अथर्वने आपल्या गुणवत्तेची आणि मेहनतीची छाप उमटवली आहे.
दुसरीकडे, राणी लक्ष्मीबाई महिला शासकीय औद्योगिक प्रशिक्षण संस्थेतील प्रशिक्षणार्थी श्रावणी चव्हाण हिने ‘फ्रूट अँड व्हेजिटेबल प्रोसेसर’ अर्थात फळे व भाजीपाला प्रक्रिया या व्यवसाय अभ्यासक्रमात राज्यासह देशात प्रथम क्रमांक मिळवला आहे. श्रावणीच्या या यशामुळे महिला प्रशिक्षणार्थींच्या कौशल्याची आणि क्षमतेचीही प्रभावी ओळख निर्माण झाली आहे.
दोन्ही प्रशिक्षणार्थ्यांच्या या उल्लेखनीय यशामागे त्यांची चिकाटी, सातत्यपूर्ण मेहनत आणि योग्य मार्गदर्शन यांचा मोलाचा वाटा आहे. अथर्वला सचिन कुलकर्णी, तर श्रावणीला मीनल दळी यांचे मार्गदर्शन लाभले. तसेच गट निदेशक, संबंधित संस्थांचे प्राचार्य आणि सर्व कर्मचाऱ्यांचे सहकार्य व प्रोत्साहनही त्यांच्या यशासाठी महत्त्वपूर्ण ठरले.
व्यवसायाभिमुख शिक्षणाच्या माध्यमातून विद्यार्थ्यांना कौशल्यपूर्ण आणि रोजगारक्षम बनवण्याच्या दृष्टीने औद्योगिक प्रशिक्षण संस्थांची भूमिका महत्त्वाची आहे. अशा संस्थांमधील प्रशिक्षणार्थ्यांनी थेट देशपातळीवर प्रथम क्रमांक मिळवणे ही रत्नागिरीसाठी निश्चितच गौरवाची बाब आहे.
अथर्व नागवेकर आणि श्रावणी चव्हाण यांच्या या यशाबद्दल त्यांचे सर्व स्तरांतून कौतुक होत असून, त्यांच्या पुढील शैक्षणिक आणि व्यावसायिक वाटचालीसाठी शुभेच्छा दिल्या जात आहेत. त्यांच्या या कामगिरीमुळे रत्नागिरीतील इतर विद्यार्थ्यांनाही कौशल्याधारित शिक्षणातून उज्ज्वल भविष्य घडवण्याची प्रेरणा मिळणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
