रत्नागिरी शहरातील विश्वनगर परिसरात गुरुवारी सायंकाळी घराला आग लागल्याची घटना घडली. नगरपालिकेच्या कर्मचारी वसाहतीसमोर राहणाऱ्या सुनील सुवरे यांच्या घरातील देवघरात लावलेल्या दिव्यामुळे ही आग लागल्याचा प्राथमिक अंदाज व्यक्त करण्यात येत आहे. काही क्षणांतच आगीने मोठे स्वरूप धारण केल्याने परिसरात एकच खळबळ उडाली. या दुर्घटनेत सुवरे कुटुंबाच्या घरातील संसारोपयोगी साहित्याचे मोठ्या प्रमाणात नुकसान झाले असून, सुमारे पावणेदोन लाख रुपयांची वित्तहानी झाल्याचा प्राथमिक अंदाज आहे.

गुरुवारी सायंकाळी सुवरे यांच्या घरातील देवघरात दिवा लावण्यात आला होता. या दिव्यामुळे अचानक आग लागली आणि पाहता पाहता आगीचा फैलाव घरातील इतर साहित्यापर्यंत झाला. आगीचे स्वरूप वाढत असल्याचे लक्षात येताच परिसरातील नागरिकांनी घटनास्थळी धाव घेतली. आगीमुळे घरातील साहित्याचे नुकसान होत असताना नागरिकांमध्ये काही काळ घबराटीचे वातावरण निर्माण झाले.
घटनेची माहिती मिळताच रत्नागिरी नगरपालिकेचा अग्निशमन बंब तातडीने घटनास्थळी दाखल झाला. अग्निशमन दलाच्या जवानांनी आग विझविण्यासाठी प्रयत्न सुरू केले. यावेळी परिसरातील स्थानिक तरुण प्रवीण वाघेला, घोसाळे, सूरज पवार, संकेत कांबळे, नरेश मोहिते आणि स्वरूप जाधव यांनीही प्रसंगावधान राखत मदतीसाठी धाव घेतली. या तरुणांनी अग्निशमन दलाच्या जवानांसोबत आग आटोक्यात आणण्यासाठी शर्थीचे प्रयत्न केले. त्यांच्या तत्परतेमुळे आग नियंत्रणात आणण्यात यश आले आणि संभाव्य मोठा अनर्थ टळला.

या आगीमध्ये सुवरे कुटुंबाच्या घरातील संसारोपयोगी वस्तूंचे मोठे नुकसान झाले आहे. घरातील दैनंदिन वापराचे साहित्य जळाल्याने कुटुंबावर अचानक आर्थिक संकट ओढवले आहे. प्राथमिक अंदाजानुसार या दुर्घटनेत सुमारे पावणेदोन लाख रुपयांचे नुकसान झाले आहे.
दरम्यान, या कठीण प्रसंगी सामाजिक कार्यकर्ते संजय (बारक्या) हळदणकर यांनी सुवरे कुटुंबाला मदतीचा हात दिला. आगीची माहिती मिळताच त्यांनी तातडीने घटनास्थळी धाव घेत कुटुंबीयांची आस्थेवाईकपणे विचारपूस केली. परिस्थितीची माहिती घेतल्यानंतर त्यांनी सुवरे कुटुंबाला तातडीने १० हजार रुपयांची रोख आर्थिक मदत दिली. संकटाच्या काळात केवळ सहानुभूती न दाखवता प्रत्यक्ष मदतीसाठी पुढे आल्याने कुटुंबाला मोठा आधार मिळाला.
या घटनेनंतर आग विझविण्यासाठी तत्परतेने मदत करणारे अग्निशमन दलाचे जवान आणि स्थानिक तरुण तसेच आर्थिक मदतीचा हात देणारे संजय हळदणकर यांचे परिसरातून कौतुक होत आहे. संकटाच्या वेळी नागरिकांनी दाखवलेली एकजूट आणि माणुसकी या घटनेतून पुन्हा एकदा अधोरेखित झाली आहे.

वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*











