मंडणगड तालुक्यातील आंबेत-म्हाप्रळ मार्गावरून विनापरवाना खैर लाकडाची वाहतूक करणाऱ्या वाहनावर वन विभागाने धडक कारवाई केली आहे. या कारवाईत खैराच्या लाकडासह वाहतुकीसाठी वापरण्यात आलेले टाटा कंपनीचे इंट्रा व्ही ३० वाहन जप्त करण्यात आले आहे. जप्त करण्यात आलेल्या लाकडाची किंमत १२ हजार ६८२ रुपये, तर वाहनाची किंमत सुमारे ३ लाख रुपये असल्याची माहिती आहे. या प्रकरणी एका व्यक्तीविरुद्ध भारतीय वन अधिनियमान्वये गुन्हा दाखल करण्यात आला आहे. वन विभागाच्या या कारवाईमुळे परिसरातील अवैध लाकूड वाहतुकीचा मुद्दा पुन्हा ऐरणीवर आला आहे.
मिळालेल्या माहितीनुसार, आंबेत मार्गे खैर लाकडाची अवैध वाहतूक होणार असल्याची गोपनीय माहिती वन विभागाच्या पथकाला मिळाली होती. या माहितीच्या आधारे वन विभागाच्या कर्मचाऱ्यांनी आंबेत पोलीस ठाण्याच्या परिसरात सापळा रचला. यावेळी संशयित वाहनाची तपासणी केली असता, टाटा कंपनीच्या इंट्रा व्ही ३० या वाहनातून विनापरवाना खैराच्या लाकडाची वाहतूक केली जात असल्याचे आढळून आले.
या वाहनाचा क्रमांक एमएच ०८ एपी ४१२२ असा आहे. तपासणीदरम्यान वाहनामध्ये खैराचे सोलीव नग आणि सोलीव किटा ही वनउपज आढळून आली. वन विभागाच्या पथकाने तातडीने कारवाई करत संबंधित लाकूड आणि वाहतुकीसाठी वापरण्यात आलेले वाहन ताब्यात घेतले.
२६२ सोलीव नगांसह खैराचे लाकूड जप्त
या कारवाईत वन विभागाने १.००३ घनमीटर आकाराचे २६२ सोलीव नग तसेच १.२३८ घनमीटर आकाराचे सोलीव किटा जप्त केले. जप्त केलेल्या खैराच्या लाकडाची एकूण किंमत सुमारे १२ हजार ६८२ रुपये असल्याचे सांगण्यात आले. याशिवाय, लाकडाच्या वाहतुकीसाठी वापरण्यात आलेले सुमारे ३ लाख रुपये किमतीचे वाहनही जप्त करण्यात आले आहे.
एका व्यक्तीविरुद्ध गुन्हा दाखल
या प्रकरणी अरविंद सखाराम काते (रा. मंडणगड, जि. रत्नागिरी) याच्याविरुद्ध भारतीय वन अधिनियम, १९२७ तसेच महाराष्ट्र वन नियमावली, २०१४ अंतर्गत विविध कलमान्वये गुन्हा नोंदविण्यात आला आहे. या प्रकरणाचा पुढील तपास मांदाटणे वनपरिमंडळाचे वनपरिमंडळ अधिकारी तुळशीराम चावरेकर करीत आहेत.
अवैध वाहतूक रोखण्यासाठी आंबेतमध्ये चेकपोस्ट
दरम्यान, आंबेत मार्गे मंडणगड परिसरात होणाऱ्या खैर लाकडाच्या अवैध वाहतुकीला आळा घालण्यासाठी वन विभागामार्फत आंबेत येथे विशेष तपासणी नाका अर्थात चेकपोस्ट उभारण्यात येणार आहे. या तपासणी नाक्यामुळे या मार्गावरील वनउपजाच्या वाहतुकीवर लक्ष ठेवणे आणि विनापरवाना वाहतूक रोखणे शक्य होणार आहे.
वनसंपत्तीचे संरक्षण करण्यासाठी अवैध वृक्षतोड, वन्यजीवांची शिकार, वनवणवा किंवा अवैध लाकूड वाहतुकीसंदर्भात नागरिकांना कोणतीही माहिती मिळाल्यास त्यांनी वन विभागाच्या १९२६ या टोल फ्री क्रमांकावर किंवा स्थानिक वन अधिकाऱ्यांशी संपर्क साधावा, असे आवाहन करण्यात आले आहे. माहिती देणाऱ्या व्यक्तीचे नाव पूर्णपणे गोपनीय ठेवण्यात येईल, असेही वन विभागाकडून स्पष्ट करण्यात आले आहे.
वनसंपत्तीचे संरक्षण आणि अवैध लाकूड वाहतुकीला आळा घालण्यासाठी वन विभागाने केलेल्या या कारवाईनंतर आता आंबेत येथे उभारण्यात येणाऱ्या तपासणी नाक्यामुळे या मार्गावरील वाहतुकीवर कितपत नियंत्रण येते, याकडे लक्ष लागले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
