रत्नागिरीहून बोरिवलीकडे जाणाऱ्या राज्य परिवहन महामंडळाच्या बसचा चाफे-कातळवाडी परिसरात अपघात झाल्याची घटना शुक्रवारी सकाळी घडली. अचानक रस्त्यावर गाय आडवी आल्याने हा अपघात झाला असून, यात एका प्रवाशाला दुखापत झाली आहे. सुदैवाने बसमधील इतर सर्व प्रवासी सुरक्षित असून मोठी दुर्घटना टळली.
मिळालेल्या माहितीनुसार, एमएच-२० बीएल २९४५ क्रमांकाची रत्नागिरी-बोरिवली एसटी बस शुक्रवारी सकाळी सुमारे ६.३० वाजता रत्नागिरी आगारातून बोरिवलीच्या दिशेने रवाना झाली होती. बस चाफे-कातळवाडी परिसरातून जात असताना अचानक एक गाय रस्त्यावर आली. चालकाने प्रसंगावधान राखत वाहनावरील नियंत्रण कायम ठेवण्याचा प्रयत्न केला, मात्र गाय वाचविण्याच्या प्रयत्नात बसचा अपघात झाला.
अपघात होताच बसमधील प्रवाशांमध्ये काही काळ घबराटीचे वातावरण निर्माण झाले. घटनेची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले. अपघातात जखमी झालेल्या प्रवाशाला तातडीने उपचारासाठी जाकादेवी येथील रुग्णालयात हलविण्यात आले. प्राथमिक माहितीनुसार त्याची प्रकृती स्थिर असून त्याच्यावर वैद्यकीय उपचार सुरू आहेत.
दरम्यान, अपघातात बससमोर आलेली गायही जखमी झाली आहे. स्थानिकांनी तिची देखील काळजी घेत संबंधितांना याबाबत माहिती दिली. अपघातानंतर काही काळ वाहतुकीवर परिणाम झाला होता. मात्र, स्थानिकांच्या मदतीने परिस्थिती लवकरच सुरळीत करण्यात आली.
या घटनेमुळे ग्रामीण भागातील रस्त्यांवर मोकाट जनावरांचा वाढता वावर पुन्हा एकदा चर्चेचा विषय ठरला आहे. विशेषतः पहाटे आणि सकाळच्या वेळेत रस्त्यावर अचानक जनावरे आल्यामुळे वाहनचालकांसमोर अपघाताचा धोका निर्माण होत असल्याचे नागरिकांकडून सांगितले जात आहे.
सुदैवाने या अपघातात कोणतीही जीवितहानी झाली नसून चालकाच्या सतर्कतेमुळे मोठी दुर्घटना टळल्याची भावना प्रवासी आणि स्थानिकांनी व्यक्त केली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
