संगमेश्वर येथील मुंबई-गोवा राष्ट्रीय महामार्गावरील तुरळ येथील गणपती मंदिराजवळ शुक्रवारी दुपारी भीषण अपघात घडला. भरधाव वेगाने जाणाऱ्या टेम्पोने रस्त्याच्या कडेला उभ्या असलेल्या कंटेनरला जोरदार धडक दिल्याने टेम्पो पलटी झाला आणि केबिनचा अक्षरशः चेंदामेंदा झाला.
या भीषण अपघातात कोल्हापूर येथील चालक रितेश पाटील गंभीर जखमी झाला. धडकेनंतर चालक केबिनमध्ये अडकून पडला होता. अपघातानंतर घटनास्थळी मोठी गर्दी जमली होती.
स्थानिक नागरिक आणि पत्रकार मिलिंद चव्हाण यांनी तत्काळ मदतकार्य सुरू करत सहकाऱ्यांच्या मदतीने जखमी चालकाला बाहेर काढले. त्यानंतर १०८ रुग्णवाहिकेद्वारे त्याला संगमेश्वर ग्रामीण रुग्णालयात दाखल करण्यात आले. प्राथमिक उपचारानंतर प्रकृती गंभीर असल्याने पुढील उपचारासाठी जिल्हा शासकीय रुग्णालयात हलविण्यात आले.
अपघातानंतर महामार्गावर काही काळ वाहतुकीची कोंडी निर्माण झाली होती. महामार्ग पोलिसांनी घटनास्थळी धाव घेत अपघातग्रस्त वाहने बाजूला करून वाहतूक सुरळीत केली.
दरम्यान, आरवली ते तळेकांटे या पट्ट्यात सातत्याने अपघातांच्या घटना घडत असल्याने वाहनचालकांमध्ये भीतीचे वातावरण निर्माण झाले आहे. या धोकादायक पट्ट्यात सुरक्षेच्या दृष्टीने ठोस उपाययोजना कराव्यात, अशी मागणी स्थानिक नागरिकांकडून करण्यात येत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
