दापोली तालुक्यातील टेटेवली ब्राम्हणवाडी येथे राहणाऱ्या १३ वर्षीय मुलीचा हृदयविकाराच्या त्रासामुळे दुर्दैवी मृत्यू झाल्याची घटना घडली आहे. सुष्मिता बिसाल मगर असे मृत मुलीचे नाव असून, ती मूळची नेपाळ येथील असल्याची माहिती समोर आली आहे. या घटनेमुळे परिसरात हळहळ व्यक्त केली जात आहे.
पोलीसांकडून मिळालेल्या माहितीनुसार, सुष्मिता हिला लहानपणापासूनच हृदयविकाराचा त्रास होता. तिच्यावर सन २०१४ मध्ये हृदयाची शस्त्रक्रियाही करण्यात आली होती. गेल्या काही दिवसांपासून तिची प्रकृती अधूनमधून बिघडत असल्याचे कुटुंबीयांनी सांगितले.
रविवार दिनांक ११ मे रोजी तिला उलट्यांचा त्रास सुरू झाला होता. प्रकृती ठीक नसल्यामुळे तिने दिवसभर अन्नही घेतले नव्हते. रात्री उशिरापर्यंत तिची प्रकृती चिंताजनक असल्याने कुटुंबीय तिच्यावर लक्ष ठेवून होते.
दरम्यान, रात्री सुमारे २ वाजण्याच्या सुमारास तिचे वडील बिसाल रमेश मगर यांनी तिला उठविण्याचा प्रयत्न केला असता ती कोणतीही हालचाल करत नसल्याचे त्यांच्या निदर्शनास आले. मुलगी प्रतिसाद देत नसल्याचे लक्षात येताच कुटुंबीयांनी घाबरून तिला तातडीने उपचारासाठी उपजिल्हा रुग्णालयात दाखल केले.
उपजिल्हा रुग्णालय दापोली येथील वैद्यकीय अधिकाऱ्यांनी तपासणी केली असता पहाटे ३.५६ वाजता तिला मृत घोषित करण्यात आले. या घटनेनंतर कुटुंबीयांवर दुःखाचा डोंगर कोसळला आहे.
या प्रकरणी पोलिसांनी बी.एन.एस.एस. कलम १९४ अंतर्गत आकस्मिक मृत्यूची नोंद केली असून पुढील कार्यवाही सुरू आहे. प्राथमिक माहितीनुसार हृदयविकारामुळे मृत्यू झाल्याचा अंदाज व्यक्त करण्यात येत असला तरी वैद्यकीय अहवालानंतरच नेमके कारण स्पष्ट होणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
