खेड : तालुक्यातील वावे काजू फाटा परिसरात मंगळवारी घडलेल्या एका दुर्दैवी घटनेत १२ वर्षीय बालिकेचा नदीच्या डोहात बुडून मृत्यू झाला. मानसी रामचंद्र कदम (रा. धामणंद, रोहीदासवाडी, ता. खेड) असे मृत बालिकेचे नाव असून, या घटनेमुळे संपूर्ण तालुक्यात हळहळ व्यक्त होत आहे.
मिळालेल्या माहितीनुसार, मानसी ही मंगळवार, दि. २८ एप्रिल रोजी सकाळच्या सुमारास आपल्या आईसोबत वावे काजू फाटा येथील नदीवर कपडे धुण्यासाठी गेली होती. उन्हाळ्याचे दिवस असल्याने नदीत पाणी कमी असले तरी काही ठिकाणी खोल डोह तयार झाले आहेत. मानसीची आई रीना कदम या कपडे धुण्यात व्यस्त असताना मानसी नदीकाठावर खेळत होती.
दरम्यान, खेळताना तिचा अचानक तोल गेला आणि पाय घसरून ती थेट नदीतील खोल डोहात पडली. पाण्याचा अंदाज न आल्याने ती बुडू लागली. हा प्रकार लक्षात येताच आईने आरडाओरडा केला. तिच्या आवाजाने परिसरातील ग्रामस्थांनी घटनास्थळी धाव घेतली.
ग्रामस्थांनी तातडीने नदीत उतरून शोधमोहीम सुरू केली. काही वेळाच्या अथक प्रयत्नांनंतर सकाळी सुमारे ११.३० वाजण्याच्या सुमारास मानसीला पाण्याबाहेर काढण्यात आले. त्या वेळी ती बेशुद्ध अवस्थेत होती. ग्रामस्थांच्या मदतीने तिला तात्काळ वावे येथील प्राथमिक आरोग्य केंद्रात नेण्यात आले. प्राथमिक उपचारानंतर तिची प्रकृती अत्यंत गंभीर असल्याचे लक्षात येताच डॉक्टरांनी तिला पुढील उपचारासाठी कळंबणी येथील उपजिल्हा रुग्णालयात हलवण्याचा सल्ला दिला.
मात्र, उपजिल्हा रुग्णालयात दाखल केल्यानंतर वैद्यकीय अधिकाऱ्यांनी तपासणीअंती मानसीला उपचारापूर्वीच मृत घोषित केले. या घटनेने तिच्या कुटुंबीयांवर दुःखाचा डोंगर कोसळला आहे.
घटनेची माहिती मिळताच खेड पोलीस ठाण्याचे अधिकारी तात्काळ रुग्णालयात दाखल झाले. त्यांनी पंचनामा करून मृतदेह शवविच्छेदनासाठी पाठवला. या प्रकरणी खेड पोलीस ठाण्यात बी.एन.एस.एस. कलम १९४ अन्वये आकस्मिक मृत्यूची नोंद करण्यात आली आहे.
दरम्यान, उन्हाळ्याच्या काळात नदी, विहिरी आणि डोहांजवळ खेळताना लहान मुलांनी आणि पालकांनी विशेष काळजी घ्यावी, असे आवाहन ग्रामस्थांकडून करण्यात येत आहे. या दुर्दैवी घटनेमुळे धामणंद गावासह संपूर्ण खेड तालुक्यावर शोककळा पसरली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
