चिपळूण तालुक्यातील कोळकेवाडी येथील कुंभारवाडी परिसरात भरदिवसा घडलेल्या घरफोडीच्या घटनेने परिसरात खळबळ उडाली आहे. अज्ञात चोरट्याने बंद घराला लक्ष्य करत सोन्या-चांदीचे दागिने, रोख रक्कम तसेच महत्त्वाची कागदपत्रे लंपास केली असून, या घटनेत एकूण २ लाख ३४ हजार ४०० रुपयांचा ऐवज चोरीला गेला आहे.
मिळालेल्या माहितीनुसार, फिर्यादी अश्विनी एकनाथ साळवी (वय ४९, रा. कोळकेवाडी, कुंभारवाडी) यांनी २४ एप्रिल २०२६ रोजी दुपारी आपल्या घराला कुलूप लावून बाहेर पडल्या होत्या. याच दरम्यान, दुपारी अंदाजे १:३० ते २:३० या वेळेत अज्ञात चोरट्याने त्यांच्या घराचा दरवाजा कडीकोयंडा उघडून आत प्रवेश केला. घरातील कपाटात ठेवलेल्या चॉकलेटी रंगाच्या पर्समध्ये असलेले सोन्या-चांदीचे दागिने, रोख रक्कम आणि विविध महत्त्वाची कागदपत्रे चोरून नेण्यात आली.
चोरीस गेलेल्या ऐवजात सुमारे ३९ तोळे ५ ग्रॅम वजनाचे सोन्याचे दागिने (किंमत अंदाजे २ लाख १८ हजार ९०० रुपये), २७ ग्रॅम वजनाचे चांदीचे दागिने (किंमत ५ हजार ५०० रुपये) आणि १० हजार रुपये रोख रक्कम यांचा समावेश आहे. तसेच पर्समध्ये ठेवलेली पॅनकार्ड, बँक ऑफ इंडियाचे पासबुक, मतदान ओळखपत्र, आयुष्यमान कार्ड आणि आधारकार्ड ही महत्त्वाची कागदपत्रेही चोरट्याने चोरून नेली आहेत.
घरात चोरी झाल्याचे लक्षात येताच अश्विनी साळवी यांनी तात्काळ चिपळूण पोलीस ठाण्यात धाव घेत तक्रार दाखल केली. त्यांच्या तक्रारीवरून पोलिसांनी २४ एप्रिल रोजी सायंकाळी ४:३१ वाजता अज्ञात आरोपीविरुद्ध भारतीय न्याय संहिता २०२३ च्या कलम ३०५ अंतर्गत गुन्हा रजिस्टर क्रमांक १७/२०२६ नुसार दाखल केला आहे.
भरदिवसा घडलेल्या या धाडसी चोरीमुळे कुंभारवाडी परिसरात भीतीचे वातावरण निर्माण झाले आहे. चोरट्याने घरात प्रवेश करण्यासाठी कोणती पद्धत वापरली, तसेच त्याला घरातील वस्तूंची पूर्वमाहिती होती का, याचा तपास पोलीस करत आहेत. परिसरातील सीसीटीव्ही कॅमेऱ्यांचे फुटेज तपासले जात असून, संशयितांचा शोध सुरू आहे.
दरम्यान, पोलीस प्रशासनाने नागरिकांना आवाहन केले आहे की, घर बंद ठेवताना आवश्यक ती खबरदारी घ्यावी, मौल्यवान वस्तू सुरक्षित ठिकाणी ठेवाव्यात आणि संशयास्पद हालचाली आढळल्यास त्वरित पोलिसांना कळवावे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
