गुहागर तालुक्यातील आरे ते पाटपन्हाळे जाणाऱ्या रस्त्यावर भरदिवसा एका महिलेच्या गळ्यातील सोन्याचे मंगळसूत्र हिसकावून नेल्याची धक्कादायक घटना गुरुवारी (दि. ३० जुलै) दुपारी घडली. या प्रकारामुळे परिसरात भीतीचे वातावरण निर्माण झाले असून, गुहागर पोलीस ठाण्यात अज्ञात दुचाकीस्वाराविरोधात गुन्हा दाखल करण्यात आला आहे.
याप्रकरणी. अवनी समीर पागडे (वय ३६, रा. वाकी, पो. आरे स्वातंत्र्यवाडी, ता. गुहागर, जि. रत्नागिरी) यांनी फिर्याद दाखल केली आहे. पोलिसांनी दिलेल्या माहितीनुसार, वाकी-पिंपळवट सीमेवर त्यांचे किराणा मालाचे दुकान आहे. गुरुवारी दुपारी साडेबारा वाजण्याच्या सुमारास त्यांनी दुकान बंद करून आपल्या मुलीला शाळेतून आणण्यासाठी आरे–पाटपन्हाळे रस्त्याने पायी जाण्यास सुरुवात केली.
यावेळी काळ्या रंगाच्या दुचाकीवरून आलेला एक अज्ञात व्यक्ती त्यांच्या जवळ थांबला. त्याने काळ्या रंगाचा रेनकोट परिधान केला होता आणि डोक्यावर हेल्मेट असल्यामुळे त्याचा चेहरा स्पष्ट दिसू शकला नाही. क्षणाचाही विलंब न लावता त्याने सौ. पागडे यांच्या गळ्यातील सोन्याचे मंगळसूत्र जबरदस्तीने हिसकावले आणि पाटपन्हाळे गावाच्या दिशेने वेगाने पसार झाला.
चोरीस गेलेले मंगळसूत्र एक पदरी असून त्यामध्ये काळे व सोन्याचे मणी गुंफलेले आहेत तसेच एक डवळी (वाटी) आहे. सुमारे पाच ग्रॅम वजनाच्या या वापरातील मंगळसूत्राची किंमत अंदाजे २५ हजार रुपये असल्याचे फिर्यादीत नमूद करण्यात आले आहे.
घटना घडल्यानंतर घाबरलेल्या. पागडे यांनी तात्काळ गुहागर पोलीस ठाण्यात धाव घेऊन तक्रार नोंदवली. त्यांच्या फिर्यादीवरून पोलिसांनी गुरुवारी सायंकाळी अज्ञात आरोपीविरोधात गुन्हा दाखल केला असून पुढील तपास सुरू आहे.
भरदिवसा निर्जन रस्त्यावर घडलेल्या या धाडसी हिसकावण्याच्या घटनेमुळे परिसरातील नागरिकांमध्ये भीतीचे वातावरण पसरले आहे. घटनास्थळ परिसरातील सीसीटीव्ही फुटेज, संशयित दुचाकीचा मागोवा आणि तांत्रिक तपासाच्या माध्यमातून आरोपीचा शोध घेण्याचे काम गुहागर पोलीस करत आहेत. तसेच नागरिकांनी अपरिचित व्यक्ती किंवा संशयास्पद हालचाली आढळल्यास त्वरित पोलिसांना माहिती देण्याचे आवाहन करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
