मंडणगड तालुक्यातील केळवत घाटाच्या उतारावरील वळणावर दुचाकी आणि मारुती ब्रेझा कार यांच्यात समोरासमोर धडक होऊन झालेल्या अपघातात तिघेजण जखमी झाले. ही घटना ७ नोव्हेंबर २०२६ रोजी सायंकाळी सुमारे ७ वाजण्याच्या सुमारास घडली. या अपघातात दुचाकीवरील राज नबीसाब मल्ला (वय ५२) यांच्यासह त्यांचे दोन कामगार जखमी झाले आहेत.
पोलिसांनी दिलेल्या माहितीनुसार, राज नबीसाब मल्ला हे आपल्या कामावर असलेल्या देवकुमार खैरवाल आणि जैमुद्दीन शेख यांना दुचाकीवरून घेऊन मंडणगडच्या दिशेने येत होते. त्यांची दुचाकी होंडा (क्रमांक एमएच ०८ एक्स ७३५७) केळवत घाटातील उताराच्या वळणावर आली असता समोरून येणाऱ्या मारुती ब्रेझा कारने (क्रमांक एमएच १२ झेडएस ५२४७) त्यांच्या दुचाकीला जोरदार धडक दिली.
ही कार आशुतोष अशोक पंढरपूरकर (वय ५४, रा. उजवी भुसारी कॉलनी, पौड रोड, कोथरूड, पुणे) चालवत होते. या धडकेत दुचाकीवरील तिघांनाही दुखापती झाल्या. त्यामध्ये राज नबीसाब मल्ला (वय ५२, रा. पालघर, ता. मंडणगड), देवकुमार मेहलाल खैरवाल (वय २७, रा. महाड, जि. रायगड, मूळ रा. मध्य प्रदेश) आणि जैमुद्दीन आनु शेख (वय ४२, रा. सौमित्रनगर, बायपास, ठाणे) यांचा समावेश आहे.
या अपघातप्रकरणी राज मल्ला यांचे भाऊ मेहबूब नबीसाब मल्ला (वय ४९, रा. पालघर, ता. मंडणगड) यांनी फिर्याद दिली आहे. त्यानुसार मंडणगड पोलीस ठाण्यात १२ नोव्हेंबर रोजी गुन्हा रजिस्टर क्रमांक १३३/२०२६ अन्वये भारतीय न्याय संहिता २०२३ मधील कलम २८१, १२५ (अ), १२५ (ब) तसेच मोटार वाहन कायद्याच्या कलम १८४ प्रमाणे कारचालकाविरोधात गुन्हा दाखल करण्यात आला आहे.
केळवत घाटातील वळणावर झालेल्या या अपघातामुळे घाटातील वाहतुकीच्या सुरक्षिततेचा प्रश्न पुन्हा चर्चेत आला आहे. या प्रकरणी मंडणगड पोलीस पुढील तपास करीत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
