संगमेश्वर तालुक्यातील देवरूख येथील महावितरणच्या उपकेंद्र कार्यालयात कार्यरत असलेल्या यंत्रचालक (ऑपरेटर) रविंद्र रघुनाथ घाणेकर (वय ४७) यांचे शुक्रवारी दुपारी ड्युटीवर असतानाच हृदयविकाराच्या तीव्र झटक्याने दुःखद निधन झाले. कर्तव्य बजावत असताना अचानक आलेल्या या मृत्यूमुळे महावितरणच्या अधिकारी व कर्मचाऱ्यांमध्ये हळहळ व्यक्त होत असून, देवरूख परिसरातही शोककळा पसरली आहे.
रविंद्र घाणेकर हे गेल्या दीड वर्षापासून देवरूख येथील महावितरणच्या उपकेंद्र कार्यालयात यंत्रचालक म्हणून कार्यरत होते. नेहमीप्रमाणे शुक्रवारीही ते आपल्या कर्तव्यावर हजर झाले होते. दिवसभराची नियमित कामे सुरू असतानाच दुपारी २ वाजण्याच्या सुमारास अचानक त्यांच्या पाठीत दुखू लागले. त्यानंतर काही क्षणांतच त्यांना हृदयविकाराचा तीव्र झटका आला.
ही बाब लक्षात येताच उपकेंद्रातील सहकारी कर्मचाऱ्यांनी तत्काळ धाव घेत त्यांना मदत केली. प्रकृती गंभीर असल्याने त्यांना तातडीने देवरूख ग्रामीण रुग्णालयात दाखल करण्यात आले. मात्र, तेथील डॉक्टरांनी तपासणी केल्यानंतर त्यांना मृत घोषित केले. अचानक घडलेल्या या घटनेने सहकारी कर्मचाऱ्यांना मोठा धक्का बसला.
रविंद्र घाणेकर यांच्या निधनाची माहिती महावितरणच्या अधिकारी व कर्मचाऱ्यांना समजताच अनेकांनी देवरूख ग्रामीण रुग्णालयात धाव घेतली. आपल्या सहकाऱ्याचा अचानक मृत्यू झाल्याने अनेकांना अश्रू अनावर झाले. शांत, संयमी, प्रेमळ आणि कर्तव्याशी प्रामाणिक असलेला सहकारी गमावल्याची भावना यावेळी व्यक्त करण्यात आली.
रविंद्र घाणेकर हे मूळचे रत्नागिरी तालुक्यातील देऊड गावचे रहिवासी होते. गेल्या सुमारे १६ वर्षांपासून ते शासकीय सेवेत कार्यरत होते. महावितरणच्या सेवेत त्यांनी विविध ठिकाणी जबाबदारी पार पाडली. गेल्या साडेतीन वर्षांपासून ते साडवली येथील महावितरण कार्यालयात कार्यरत होते. त्यानंतर त्यांची बदली देवरूख येथील महावितरण उपकेंद्रात झाली होती.
गेल्या दीड वर्षापासून ते देवरूख उपकेंद्रात यंत्रचालक म्हणून कार्यरत होते. वीजपुरवठा सुरळीत ठेवण्यासाठी उपकेंद्रातील यंत्रणा हाताळणे, आवश्यक त्या वेळी तांत्रिक कामांमध्ये योगदान देणे आणि कर्तव्य बजावणे, अशा जबाबदाऱ्या ते नियमितपणे पार पाडत होते.
शुक्रवारीही नेहमीप्रमाणे ते ड्युटीवर होते. मात्र दुपारच्या सुमारास अचानक प्रकृती बिघडली आणि काही क्षणांतच त्यांना तीव्र हृदयविकाराचा झटका आला. सहकाऱ्यांनी वेळ न दवडता त्यांना रुग्णालयात दाखल केले; मात्र उपचारापूर्वीच त्यांचा मृत्यू झाल्याने सहकाऱ्यांवर दुःखाचा डोंगर कोसळला.
महावितरणच्या सेवेत तब्बल १६ वर्षे योगदान देणाऱ्या घाणेकर यांचा अशाप्रकारे कर्तव्यावर असतानाच झालेला मृत्यू ही त्यांच्या सहकाऱ्यांसाठी अत्यंत धक्कादायक घटना ठरली आहे. त्यांच्या अकाली निधनाने महावितरणने एक प्रामाणिक, कर्तव्यनिष्ठ आणि मनमिळावू कर्मचारी गमावल्याची भावना अधिकारी व कर्मचाऱ्यांकडून व्यक्त करण्यात येत आहे.
रविंद्र घाणेकर यांच्या पश्चात पत्नी, आई, मुलगा आणि भाऊ असा परिवार आहे. त्यांच्या अचानक निधनामुळे कुटुंबीयांवर दुःखाचा डोंगर कोसळला आहे. कर्तव्य बजावत असतानाच त्यांचा मृत्यू झाल्याने देवरूख तसेच महावितरणच्या कर्मचारी वर्तुळात हळहळ व्यक्त होत आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
