संगमेश्वर तालुक्यातील देवरुखनजीक बागवाडी येथे बंद घराला लक्ष्य करत अज्ञात चोरट्यांनी सोन्या-चांदीचे दागिने आणि रोख रकमेसह तब्बल ३ लाख ५१ हजार ९०० रुपयांचा मुद्देमाल चोरून नेल्याची घटना उघडकीस आली आहे. घराच्या मागील दरवाजाचे कुलूप तोडून चोरट्यांनी घरात प्रवेश केला आणि कपाटातील दागिने व रोकड लंपास केली. या घटनेमुळे बागवाडी परिसरात खळबळ उडाली आहे.
याप्रकरणी योगिता रवींद्र फेफडे (वय ४०, मूळ रा. शिवणे, सध्या रा. श्रीराम नारायण कदम यांच्या घरी भाड्याने, बागवाडी, ता. संगमेश्वर) यांनी देवरुख पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, ३० ऑक्टोबर रोजी सायंकाळी ४.३० वाजल्यापासून ९ नोव्हेंबर रोजी सायंकाळी ५ वाजेपर्यंत फिर्यादी यांचे घर बंद होते. याच संधीचा फायदा घेत अज्ञात चोरट्याने घराच्या पाठीमागील दरवाजावर कोणत्यातरी कठीण हत्याराने प्रहार करून दरवाजा उचकटला आणि घरात प्रवेश केला.
घरात शिरल्यानंतर चोरट्याने हॉलमधील लोखंडी पत्र्याच्या कपाटाचे लॉकर तोडले. त्यानंतर कपाटातील पत्र्याच्या डब्यात ठेवलेले सोन्या-चांदीचे दागिने आणि रोख रक्कम चोरून नेली. यामध्ये ६० हजार रुपये किमतीचा सोन्याचा हार, ८० हजार रुपये किमतीचा १२ ग्रॅम वजनाचा सोन्याचा हार आणि २५ हजार रुपये किमतीचे कानातील सोन्याचे दागिने यांचा समावेश आहे.
याशिवाय चांदीचे पैंजण, बाली, जोडवी, मासोळी, चांदीची वाटी, ब्रेसलेट आणि मनगट्या असे दागिनेही चोरट्यांनी लंपास केले. तसेच ५०० रुपयांच्या नोटांच्या स्वरूपातील १ लाख ७० हजार रुपयांची रोख रक्कमही चोरून नेण्यात आली. सोन्या-चांदीचे दागिने आणि रोख रकमेसह एकूण ३ लाख ५१ हजार ९०० रुपयांचा ऐवज चोरीला गेल्याचे फिर्यादीत नमूद करण्यात आले आहे.
या घटनेप्रकरणी १० नोव्हेंबर रोजी देवरुख पोलीस ठाण्यात गुन्हा रजिस्टर क्रमांक १७०/२०२६ नुसार भारतीय न्याय संहिता २०२३ चे कलम ३३१(१), ३३१(३), ३३१(४) आणि ३०५ अन्वये अज्ञात चोरट्यांविरोधात गुन्हा दाखल करण्यात आला आहे.
बंद घराचा मागील दरवाजा उचकटून घरातील कपाट फोडत चोरट्यांनी लाखोंचा ऐवज लंपास केल्याने परिसरात भीतीचे वातावरण निर्माण झाले आहे. या चोरीमागे कोणाचा हात आहे, याचा शोध देवरुख पोलीस घेत असून अज्ञात चोरट्यांचा कसून तपास सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
