रत्नागिरी शहरातील उद्यमनगर परिसरात अमली पदार्थांविरोधात पोलिसांनी कारवाई करत तब्बल १ किलो २९१ ग्रॅम गांजा जप्त केला आहे. जप्त करण्यात आलेल्या गांजाची बाजारातील किंमत ८० हजार १०० रुपये असल्याचे पोलिसांनी नमूद केले आहे. अमली पदार्थांची बेकायदेशीर विक्री करण्याच्या उद्देशाने गांजा जवळ बाळगल्याप्रकरणी एका २७ वर्षीय तरुणाविरुद्ध रत्नागिरी शहर पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, साहिल समीर सोलकर (वय २७, रा. मराठी शाळेजवळ, कोकणनगर, रत्नागिरी) असे गुन्हा दाखल झालेल्या संशयिताचे नाव आहे. रविवार, ८ नोव्हेंबर २०२६ रोजी सायंकाळी ४.३३ वाजण्याच्या सुमारास काझी चाळ, उद्यमनगर, रत्नागिरी येथे ही कारवाई करण्यात आली.
या कारवाईदरम्यान पोलिसांना संशयिताकडे हिरव्या-काळ्या रंगाचा उग्र वास असलेला गांजा आढळून आला. त्याची तपासणी केली असता दोन वेगवेगळ्या प्लास्टिकच्या पिशव्यांमध्ये गांजा ठेवण्यात आल्याचे समोर आले.
यामध्ये पारदर्शक प्लास्टिकच्या पिशवीत काळ्या रंगाच्या चिकट पट्टीने गुंडाळून ठेवलेला ९१० ग्रॅम गांजा आढळला. त्याची किंमत ६० हजार रुपये असल्याचे नमूद करण्यात आले आहे. तर निळ्या रंगाच्या प्लास्टिकच्या पिशवीत ३८१ ग्रॅम गांजा आढळून आला असून, त्याची किंमत २० हजार रुपये आहे. अशा प्रकारे एकूण १ किलो २९१ ग्रॅम गांजा पोलिसांनी जप्त केला आहे. गांजा ठेवण्यासाठी वापरण्यात आलेल्या प्लास्टिकच्या पिशव्या आणि काळ्या रंगाची प्रवासी बॅगही पोलिसांनी ताब्यात घेतली आहे.
या प्रकरणी रत्नागिरी शहर पोलीस ठाण्यात गुन्हा रजिस्टर क्रमांक ४६३/२०२६ अन्वये एन.डी.पी.एस. कायदा १९८५ मधील कलम ८ (क) आणि २० (ब) (ii) (ब) प्रमाणे गुन्हा दाखल करण्यात आला आहे. या प्रकरणी रत्नागिरी शहर पोलीस ठाण्याचे पोलीस हवालदार राजेश भास्करराव भुजबळ (वय ५५) यांनी फिर्याद दिली आहे.
दरम्यान, उद्यमनगरसारख्या शहरातील परिसरात गांजाचा साठा आढळल्याने अमली पदार्थांच्या बेकायदेशीर व्यवहारांचा मुद्दा पुन्हा चर्चेत आला आहे. हा गांजा नेमका कुठून आणण्यात आला होता, त्याचा पुरवठा कोण करत होते आणि या व्यवहारामागे आणखी कोणाचे जाळे कार्यरत आहे का, याचा तपास आता पोलिसांकडून केला जात आहे.
रत्नागिरी शहरात अमली पदार्थांच्या बेकायदेशीर व्यवहारांविरोधात पोलिसांनी केलेल्या या कारवाईमुळे गांजा विक्रीच्या साखळीपर्यंत पोहोचण्याचे आव्हान पोलिसांसमोर असणार आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
