चिपळूणच्या शेतकऱ्यांना दिलासा, चिपळूण तालुका दुष्काळग्रस्त जाहीर, शेखर निकम यांच्या पाठपुराव्याला यश

यंदाच्या पावसाळ्यात पावसाने दिलेल्या दीर्घ खंडामुळे शेतीचे नुकसान झालेल्या चिपळूण तालुक्याला राज्य शासनाने दुष्काळग्रस्त म्हणून जाहीर केले आहे. चिपळूण विधानसभा मतदारसंघाचे आमदार शेखर निकम यांनी शासन दरबारी केलेल्या सातत्यपूर्ण पाठपुराव्याला यश आले असून, या निर्णयामुळे बाधित शेतकऱ्यांना मोठा दिलासा मिळण्याची अपेक्षा आहे.

यंदाच्या पावसाळ्यात जुलै आणि ऑगस्ट महिन्यांत अपेक्षित पाऊस न झाल्याने चिपळूण तालुक्यातील शेतीवर विपरीत परिणाम झाला. भातशेतीसह कोकणातील पारंपरिक नागली आणि वरी या पिकांचेही नुकसान झाले. अनेक ठिकाणी पावसाअभावी पिके करपल्याने शेतकऱ्यांना आर्थिक संकटाचा सामना करावा लागला.

शेतकऱ्यांची ही परिस्थिती लक्षात घेऊन आमदार शेखर निकम यांनी सुरुवातीपासूनच चिपळूण तालुक्याचा दुष्काळग्रस्त यादीत समावेश करण्यासाठी प्रयत्न केले. त्यांनी विधिमंडळात हा प्रश्न उपस्थित करण्याबरोबरच मंत्रालयात मुख्यमंत्री, दोन्ही उपमुख्यमंत्री, जिल्ह्याचे पालकमंत्री आणि मदत व पुनर्वसन मंत्री यांची भेट घेऊन तालुक्यातील शेतीच्या नुकसानीची माहिती शासनाच्या निदर्शनास आणून दिली होती. वस्तुनिष्ठ पाहणी अहवाल सादर करून चिपळूणला दुष्काळग्रस्त घोषित करण्याची मागणीही त्यांनी केली होती.

अखेर राज्य शासनाने चिपळूण तालुक्याला दुष्काळग्रस्त घोषित करण्याचा निर्णय घेतला. त्यामुळे बाधित शेतकऱ्यांना पीक विमा भरपाई, पीक कर्ज पुनर्गठन, कृषी वीजबिलात सवलत, जमीन महसुलात सवलत किंवा माफी, रोजगार हमी योजनेंतर्गत कामांमध्ये वाढ आणि विद्यार्थ्यांच्या शैक्षणिक शुल्कात सवलत अशा विविध उपाययोजनांचा लाभ मिळण्याची शक्यता आहे. मात्र, या सवलतींचा प्रत्यक्ष लाभ संबंधित शासन निर्णयातील निकष आणि पात्रतेनुसार मिळणार आहे.

चिपळूण तालुक्याला दुष्काळग्रस्त घोषित करून शेतकऱ्यांना दिलासा दिल्याबद्दल आमदार शेखर निकम यांनी राज्य शासन, मुख्यमंत्री, दोन्ही उपमुख्यमंत्री, पालकमंत्री आणि मदत व पुनर्वसन मंत्री यांचे आभार मानले आहेत.

शासनाच्या या निर्णयामुळे संकटात सापडलेल्या शेतकऱ्यांना दिलासा मिळण्याची आशा निर्माण झाली असून, आता प्रत्यक्ष मदत आणि सवलतींच्या अंमलबजावणीकडे शेतकरी वर्गाचे लक्ष लागले आहे.

प्रतिनिधी

वेगवान बातमी, अचूक आणि थेट भूमिका !

कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म

©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*