ज्या वयात मायेची ऊब, प्रेम आणि आधाराची सर्वाधिक गरज असते, त्याच वयात मारहाणीचे घाव सहन कराव्या लागलेल्या संगमेश्वर तालुक्यातील नायरी येथील ९१ वर्षीय जलेखा इसाक मोडक यांची अखेर मृत्यूशी झुंज संपली. सुनेने केलेल्या कथित मारहाणीत गंभीर जखमी झालेल्या या वृद्ध माऊलीचा उपचारादरम्यान मृत्यू झाल्याची दुर्दैवी घटना समोर आली आहे.
या घटनेमुळे नायरीसह संपूर्ण परिसरात हळहळ व्यक्त होत असून, वृद्धांच्या सुरक्षिततेचा आणि कौटुंबिक नात्यांमधील संवेदनशीलतेचा प्रश्न पुन्हा ऐरणीवर आला आहे.
मिळालेल्या माहितीनुसार, २९ ऑक्टोबर २०२६ रोजी सायंकाळच्या सुमारास संगमेश्वर तालुक्यातील नायरी येथील राहत्या घरी हा धक्कादायक प्रकार घडला होता. जलेखा इसाक मोडक (वय ९१) या वृद्धापकाळामुळे घरातच असायच्या. त्यांची देखभाल करण्याची जबाबदारी सुनेवर होती. मात्र, सतत घरात राहून वृद्ध सासूची काळजी घ्यावी लागते आणि त्यामुळे आपल्याला कुठेही बाहेर फिरायला जाता येत नाही, या कारणावरून घरात वाद निर्माण झाल्याचे समोर आले आहे.
याच कारणावरून सून नाशिरा अस्लम मोडक हिने आपल्या ९१ वर्षीय सासूला लाकडी दांडक्याने तसेच हाताबुक्क्यांनी मारहाण केल्याचा आरोप आहे. या मारहाणीत वृद्ध जलेखा मोडक यांच्या दोन्ही पायांना, गुडघ्याला तसेच हाताच्या मनगटाला गंभीर दुखापत झाली होती. वयाच्या ९१ व्या वर्षी अशा प्रकारची मारहाण झाल्याने त्यांची प्रकृती चिंताजनक बनली होती.
या घटनेची माहिती मिळाल्यानंतर वृद्धेची कन्या जैबुनिसा निजामुद्दीन लांबे यांनी पनवेल पोलिसांकडे धाव घेतली. त्यांनी दिलेल्या तक्रारीच्या आधारे सुनेविरोधात गुन्हा दाखल करण्यात आला होता. या प्रकरणामुळे वृद्ध महिलेला झालेल्या मारहाणीचा मुद्दा चर्चेत आला होता.
दरम्यान, गंभीर जखमी झालेल्या जलेखा मोडक यांच्यावर उपचार सुरू होते. मात्र, वयोमान आणि दुखापतींमुळे त्यांची प्रकृती सुधारू शकली नाही. अखेर उपचारादरम्यान त्यांची प्राणज्योत मालवली. एका वृद्ध माऊलीचा अशा प्रकारे दुर्दैवी अंत झाल्याने नायरी परिसरात शोककळा पसरली आहे. त्यांचा मृतदेह अंत्यविधीसाठी नायरी येथे आणण्यात येत असल्याची माहिती आहे.
शवविच्छेदन अहवालाकडे लक्ष
जलेखा मोडक यांच्या मृत्यूनंतर आता या प्रकरणाला अधिक गंभीर वळण मिळण्याची शक्यता आहे. मारहाणीत झालेल्या दुखापती आणि त्यानंतर झालेला मृत्यू यांचा वैद्यकीयदृष्ट्या परस्पर संबंध आहे का, हे शवविच्छेदन अहवालातून स्पष्ट होणार आहे. त्यानुसार तपास यंत्रणांकडून पुढील कायदेशीर कारवाई केली जाण्याची शक्यता आहे. संबंधित प्रकरणात पोलिसांचा पुढील तपास आणि वैद्यकीय अहवाल महत्त्वाचा ठरणार आहे.
वृद्धापकाळात कुटुंबीयांच्या प्रेमाची, सहवासाची आणि आधाराची अपेक्षा असते. मात्र, देखभालीच्या जबाबदारीवरून वाद होऊन एका ९१ वर्षीय वृद्ध महिलेला मारहाणीला सामोरे जावे लागल्याचा आरोप आणि त्यानंतर झालेला त्यांचा मृत्यू समाजमन सुन्न करणारा आहे. वृद्धांचे आयुष्य सन्मानाने आणि सुरक्षिततेत जावे, ही अपेक्षा असताना नायरीतील या घटनेने कौटुंबिक नात्यांमधील माणुसकीचा प्रश्न उपस्थित केला आहे.
या प्रकरणातील मृत्यूचे नेमके कारण शवविच्छेदन अहवालातून स्पष्ट होणे बाकी असून, सुनेवरील आरोप तपासाधीन आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
