आईवर झालेली ब्रेन ट्यूमरची शस्त्रक्रिया आणि त्यानंतर तिची सुरू असलेली प्रकृतीची समस्या यामुळे मानसिक तणावात असलेल्या २४ वर्षीय तरुणाने गळफास घेऊन जीवन संपविल्याची दुर्दैवी घटना जयगड परिसरातील सैतवडे पेठ मोहल्ला येथे १९ सप्टेंबर रोजी रात्री घडली. रंजित दत्ताराम तांडेल (वय २४, रा. धाकटी जांभारी, ता. जि. रत्नागिरी) असे मृत तरुणाचे नाव आहे.
मिळालेल्या माहितीनुसार, रंजित यांच्या आईवर काही दिवसांपूर्वी ब्रेन ट्यूमरचे ऑपरेशन झाले होते. आईच्या आजारपणामुळे रंजित हे काही दिवसांपासून मानसिक तणावात असल्याची माहिती समोर आली आहे. त्यांना दारूचे व्यसनही लागले होते.
१९ सप्टेंबर रोजी घरातील गणपती विसर्जन झाल्यानंतर रात्री सुमारे ८ वाजता चुलत भावाला सोडून येतो, असे सांगून रंजित घराबाहेर पडले. त्यानंतर त्यांनी त्यांचे चुलत भाऊ केतन तांडेल यांना व्हॉट्सॲपवर ‘हा माझा शेवटचा मेसेज आहे’ असा संदेश पाठविला.
हा संदेश मिळाल्यानंतर नातेवाइकांनी रंजित यांचा शोध सुरू केला. शोध घेत असताना घरापासून सुमारे १०० मीटर अंतरावर सैतवडे पेठ मोहल्ला येथील स्मशानभूमीजवळील आंब्याच्या झाडाला ते लटकलेल्या अवस्थेत आढळून आले. त्यावेळी ते बेशुद्ध अवस्थेत होते.
नातेवाइकांनी त्यांना तातडीने प्राथमिक आरोग्य केंद्र वाटद-खंडाळा येथे नेले. तेथे प्राथमिक उपचार केल्यानंतर पुढील उपचारासाठी रत्नागिरीकडे नेत असताना जाकादेवी येथे त्यांच्यात कोणतीही हालचाल जाणवली नाही. त्यानंतर त्यांना प्राथमिक आरोग्य केंद्र जाकादेवी येथे दाखल करण्यात आले. वैद्यकीय अधिकाऱ्यांनी तपासणी केल्यानंतर त्यांना मृत घोषित केले.
या घटनेची नोंद जयगड पोलीस ठाण्यात आकस्मिक मृत्यू म्हणून करण्यात आली असून, पुढील कार्यवाही सुरू आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
