गणपतीच्या आरतीनंतर सहा महिन्यांपासून सुरू असलेल्या जमिनीच्या वादाची चर्चा पुन्हा उफाळून आल्याने नांदगाव-भुवडवाडी येथे दोन गटांत मारामारी झाल्याची घटना १८ सप्टेंबर रोजी रात्री साडेसातच्या सुमारास घडली. या मारामारीत वैभव ठोंबरे आणि त्यांची पत्नी विधी ठोंबरे हे जखमी झाले असून, या प्रकरणी सावर्डे पोलिस ठाण्यात नऊ जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, नांदगाव-भुवडवाडी येथील वैभव गणपत ठोंबरे यांच्या घरी गणपतीच्या आरतीचे आयोजन करण्यात आले होते. आरतीसाठी वाडीतील नागरिक मोठ्या संख्येने जमले होते. आरतीचा कार्यक्रम आटोपल्यानंतर वैभव ठोंबरे हे राकेश लाखण आणि मारुती ठोंबरे यांच्यासोबत गेल्या सहा महिन्यांपासून सुरू असलेल्या जमिनीच्या वादाबाबत चर्चा करत होते.
चर्चेदरम्यान संबंधितांमध्ये शाब्दिक बाचाबाची सुरू झाली. परिस्थिती वाढू नये म्हणून वैभव ठोंबरे यांनी समंजसपणे बोलून हा विषय सोडवूया, अशी भूमिका घेतल्याचे फिर्यादीत नमूद करण्यात आले आहे. मात्र, त्यानंतर वाद अधिक वाढला आणि आरोपींनी वैभव ठोंबरे यांना धक्काबुक्की करत लाथाबुक्क्यांनी मारहाण केल्याचा आरोप करण्यात आला आहे.
या झटापटीदरम्यान एका आरोपीने हातातील पितळी टाळाने वैभव ठोंबरे यांच्या डोक्यावर मारल्याचे फिर्यादीत म्हटले आहे. त्यामुळे त्यांच्या डोक्याला दुखापत झाली. तसेच दुसऱ्या आरोपीने पितळी टाळाने त्यांच्या पाठीवर मारल्याने मुका मार लागल्याचेही नमूद करण्यात आले आहे.
दरम्यान, पतीला मारहाण होत असल्याचे पाहून विधी ठोंबरे या त्यांना सोडवण्यासाठी पुढे आल्या. यावेळी झालेल्या झटापटीमध्ये पितळी टाळ त्यांच्या कपाळाला लागल्याने त्यांनाही दुखापत झाली. दोन्ही जखमींवर उपचार करण्यात आले आहेत.
या घटनेनंतर वैभव गणपत ठोंबरे यांनी सावर्डे पोलिस ठाण्यात फिर्याद दाखल केली. त्यांच्या फिर्यादीवरून राकेश सुरेश लाखण, सोमा जिरु लाखण, विजय शंकर ठोंबरे, संजय शंकर ठोंबरे, प्रविण गजानन ठोंबरे, किरण मास्ती ठोंबरे, प्रदीप गजानन ठोंबरे, गजानन लक्ष्मण ठोंबरे आणि मारुती लक्ष्मण ठोंबरे अशा एकूण नऊ जणांविरोधात गुन्हा दाखल करण्यात आला आहे.
पोलिसांनी आरोपींविरोधात भारतीय न्याय संहितेच्या कलम ११८(१), ११५(२), १८९(२), १९० आणि १९१(२) अन्वये कारवाई केली आहे. या घटनेमागे गेल्या सहा महिन्यांपासून सुरू असलेला जमिनीचा वाद असल्याचे पोलिसांकडून सांगण्यात आले आहे.
गणपतीच्या आरतीनंतर झालेल्या या वादामुळे परिसरात काही काळ तणावाचे वातावरण निर्माण झाले. घटनेची माहिती मिळाल्यानंतर पोलिसांनी प्रकरणाची नोंद करून तपास सुरू केला आहे. मारामारी नेमकी कोणत्या कारणावरून आणि कोणत्या क्रमाने घडली, याबाबत पोलिसांकडून पुढील तपास करण्यात येत आहे.
या प्रकरणाचा पुढील तपास सावर्डे पोलिस करत आहेत.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
