खेड तालुक्यातील तळे मांडवे येथे १६ वर्षीय युवतीचा झोपेतच अचानक प्रकृती बिघडून मृत्यू झाल्याची हृदयद्रावक घटना घडली आहे. मयुरी कैलास जगताप (वय १६) असे मृत्यू झालेल्या युवतीचे नाव आहे. मयुरीच्या अचानक झालेल्या मृत्यूने जगताप कुटुंबावर दुःखाचा डोंगर कोसळला असून, परिसरात हळहळ व्यक्त होत आहे. या घटनेची नोंद खेड पोलीस ठाण्यात आकस्मिक मृत्यू म्हणून करण्यात आली आहे.
मिळालेल्या माहितीनुसार, मयुरी ही आपल्या आई-वडिलांसह भावंडांसोबत तळे मांडवे येथे राहत होती. नेहमीप्रमाणे कुटुंबीयांनी रात्री एकत्र जेवण केले. जेवण झाल्यानंतर मयुरी आपल्या खोलीत झोपण्यासाठी गेली. त्यानंतर काही वेळातच ही दुर्दैवी घटना घडली.
दरम्यान, मयुरीचे नातेवाईक राजेंद्र रामचंद्र वाघे हे त्यांच्या खोलीत टीव्ही पाहत होते. रात्री सुमारे १२ वाजण्याच्या सुमारास त्यांना मयुरीच्या खोलीच्या दिशेने जोरात घोरण्याचा आवाज ऐकू आला. आवाजामुळे संशय आल्याने त्यांनी तातडीने मयुरीच्या खोलीत जाऊन पाहिले.
यावेळी मयुरी बेशुद्ध अवस्थेत आढळून आली. तिला उठवण्याचा प्रयत्न करूनही तिच्याकडून कोणताही प्रतिसाद मिळत नव्हता. तिच्या चेहऱ्यावर पाणी मारूनही कोणतीही हालचाल किंवा प्रतिक्रिया न आल्याने नातेवाईकांची घाबरगुंडी उडाली.
परिस्थितीचे गांभीर्य लक्षात घेऊन नातेवाईकांनी मयुरीला तातडीने उपचारासाठी कळंबणी येथील रुग्णालयात नेले. तेथे डॉक्टरांनी तिची तपासणी केली. मात्र, वैद्यकीय तपासणीनंतर डॉक्टरांनी मयुरीला मृत घोषित केले.
रात्रीपर्यंत कुटुंबीयांसोबत असलेल्या आणि जेवण करून झोपलेल्या मयुरीचा काही वेळातच अचानक मृत्यू झाल्याने कुटुंबीयांना मोठा धक्का बसला आहे. तिच्या मृत्यूचे नेमके कारण अद्याप स्पष्ट झालेले नसून, पोलिसांकडून घटनेची नोंद करून पुढील कार्यवाही करण्यात येत आहे.
या प्रकरणी खेड पोलीस ठाण्यात आकस्मिक मृत्यूची नोंद करण्यात आली असून, घटनेबाबत आवश्यक तपास सुरू आहे. मयुरीच्या अकाली आणि अचानक झालेल्या मृत्यूमुळे तळे मांडवे परिसरात शोककळा पसरली आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
