रत्नागिरी जिल्ह्यात गेल्या काही दिवसांपासून सुरू असलेल्या मुसळधार पावसाचा फटका आता घाटरस्ते आणि ग्रामीण भागालाही बसू लागला आहे. खेड तालुक्यातील खेड-खोपी-धामणंद या महत्त्वाच्या मार्गावर कासई शिंदेवाडी येथे शनिवारी पहाटे मोठे भूस्खलन होऊन डोंगराचा मोठा भाग रस्त्यावर कोसळला. या दुर्घटनेत रस्त्याचा काही भागही खचून वाहून गेल्याने मार्गावरील वाहतूक पूर्णपणे ठप्प झाली असून, परिसरातील नागरिकांसह प्रवाशांची मोठी गैरसोय झाली आहे.
पहाटेच्या सुमारास मुसळधार पावसामुळे डोंगराचा कडा अचानक खचला आणि माती, दगड तसेच झाडांसह मोठ्या प्रमाणात दरड रस्त्यावर आली. काही क्षणांतच संपूर्ण रस्ता मातीच्या ढिगाऱ्याखाली गाडला गेला. त्याचवेळी रस्त्याचा कडेलाही तडा जाऊन काही भाग वाहून गेल्याने या मार्गावरील प्रवास अत्यंत धोकादायक बनला आहे.
सुदैवाने दरड कोसळली त्यावेळी त्या ठिकाणी कोणतेही वाहन नसल्याने मोठी जीवितहानी टळली. मात्र, या घटनेनंतर दोन्ही बाजूंना वाहनांच्या लांबच लांब रांगा लागल्या. अनेक प्रवासी आणि स्थानिक नागरिकांना तासन्तास अडकून पडावे लागले.
घटनेची माहिती मिळताच सार्वजनिक बांधकाम विभागाचे अधिकारी, महसूल प्रशासन, पोलीस आणि स्थानिक यंत्रणा तातडीने घटनास्थळी दाखल झाली. जेसीबीसह अन्य अवजड यंत्रसामग्रीच्या सहाय्याने रस्त्यावर साचलेली माती आणि दगड हटविण्याचे काम युद्धपातळीवर सुरू करण्यात आले आहे. मात्र, दरडीचे प्रमाण मोठे असल्याने आणि रस्त्याचाच काही भाग खचल्याने मार्ग पूर्णपणे सुरक्षित करण्यासाठी आणखी वेळ लागण्याची शक्यता अधिकाऱ्यांनी व्यक्त केली आहे.
दरम्यान, परिसरात अद्यापही पावसाचा जोर कायम असल्याने आणखी भूस्खलन होण्याचा धोका असल्याची शक्यता प्रशासनाने वर्तवली आहे. त्यामुळे नागरिकांनी अनावश्यक प्रवास टाळावा, तसेच खेड-खोपी-धामणंद मार्गाऐवजी शक्य असल्यास पर्यायी मार्गांचा वापर करावा, असे आवाहन करण्यात आले आहे.
रस्ता सुरक्षित झाल्यानंतरच वाहतूक पुन्हा सुरू केली जाईल, अशी माहिती प्रशासनाने दिली असून, परिस्थितीवर सातत्याने लक्ष ठेवण्यात येत आहे. पावसाळ्यात डोंगराळ भागातील रस्त्यांवर प्रवास करताना वाहनचालकांनी विशेष खबरदारी घेण्याचे आवाहनही करण्यात आले आहे.
वेगवान बातमी, अचूक आणि थेट भूमिका !
कोकणातल्या बातम्या, विश्लेषण आणि महत्वाच्या गोष्टी… #कोकण आणि कोकणातील संस्कृती, सण, उत्सव, परंपरा, लोककला, खाद्यसंस्कृती आणि बरंच काही…
कोकणातील महत्वाच्या घडामोडी, रेल्वे, पर्यटन विषयक अपडेट्स तसेच इतरही अनेक ताज्या घडामोडींची वेगवान माहिती क्षणार्धात वाचकांपर्यत पोहचवीणारा डिजिटल प्लॅटफॉर्म
©️ 2024 Kokan Katta News, Media Network
Rg.No.MH-28-0047569
Ratnagiri, Dapoli
*वेगवान बातमी, अचूक आणि थेट भूमिका !*
